MEDIA-ISLAM.COM

NƏFSİN SAFLAŞDİRİLMASİ

Bu mərhələdə üç əməli yerinə yetirmək lazımdır:

a) Nəfsin batil əqidələrdən, yanlış fikirlərdən və xurafatlardan təmizlənməsi.

b) Nəfsin çirkin əxlaq və rəzil sifətlərdən təmizlənməsi.

v) Günah işlərin tərk edilməsi.

Batil əqidələr və xurafatlar cəhalət, zəlalət və nadanlıqdan ibarətdir. Onlar qəlbi, nəfsi qaraldır, insanı təkamülün düz yolundan və Allah dərgahına yaxınlaşmaqdan saxlayır. Batil əqidə sahibləri təkamül yolunu tanımadıqlarından və azğınlıq vadisində qaldığından şübhəsiz məqsədə çatmayacaqlar. Qaranlıq olan bir qəlb Allahın müqəddəs nurunun saçmasına necə mərkəz ola bilər? Eləcə də çirkin əxlaqlar heyvani xislətləri və səciyyələri gücləndirir, insani ruhu tədrici olaraq sönüklüyə doğru çəkir. Belə bir şəxs kamala və ilahi qürb məqamına çatmaqdan ibarət olan insaniyyətin əsl hədəfinə çatmayacaqdır. Günaha mürtəkib olmaq da nəfsi aludə edərək insanı təkamül yolundan saxlayır, Allaha yaxınlaşmaqdan azdırır və onu daha da uzaqlaşdırır. Belə bir şəxs yekun hədəfə nail olmayacaqdır. Deməli nəfsin saflaşdırılması bizim üçün müqəddəratı həll edən, həyati və çox zəruri işlərdən hesab olunur. Buna görə də əvvəlcə çirkin əxlaq və günahlarla tanış olmalı, daha sonra əmələ başlayıb nəfsimizi paklamalıyıq.

Xoşbəxtlikdən birinci qismdə heç bir çətinliyimiz yoxdur, çünki nəfslərin həqiqi təbibləri və ilahi insanşünaslar, yə`ni peyğəmbərlər və imamlarımız rəzil əxlaqi xüsusiyyətləri bizə tamamilə aydınlaşdırıb vəsf etmiş, hətta onların müalicə yollarını da bəyan etmişlər, həmçinin günahları sadalamış, onların tərk edilmə yollarını bizə öyrətmişlər. Bizim hamımız rəzil sifətləri tanıyır və onların çirkinliyini bilirik. Biz nifaq (münafiqlik), təkəbbür, həsəd, kin-küdurət, qəzəb, sözgəzdirmək, xəyanət, xudbinlik, bədxahlıq, siayət, töhmət, nalayiq söz danışmaq, kobud xasiyyətlilik, zülm etmək, e`timadsızlıq, qorxaqlıq, paxıllıq, hərislik, eyb axtarmaq, yalan danışmaq, dünya malına məftun olmaq, məqam və vəzifə aşiqi olmaq, riyakarlıq, aldatmaq, hiyləgərlik, sui-zən, qəlbin qəsavəti, nəfsin zəifliyi və bu qəbildən olan digər xüsusiyyətlərin pis və yaramaz olduğunu bilirik.

Bizim hamımız fitri olaraq bunların çirkinliyini dərk edirik. bundan əlavə yüzlərlə ayə və minlərlə hədis də bu xüsusiyyətlərin çirkin və qəbahətli olmasına şəhadət verir. Bu barədə hədis baxımından azacıq belə çatışmamazlıq hiss olunmur. Eləcə də bütün haramlar və günah əməllər Qur`ani-kərimdə və şərif hədislərdə şərh olunmuş, onların cəzaları bəyan edilmişdir. Biz əksər hallarda onların hamısını bilirik, buna görə də rəzil xüsusiyyətlərin, kəbirə və səğirə günahların tanınmasında heç bir çətinliyimiz yoxdur. Eyni halda əksər hallarda şeytanın və əmmarə nəfsinin əlində əsirik, nəfsimizi günahlardan, çirkin əxlaqlardan təmizləməyə müvəffəq olmuruq. Bizim əsas çətinliyimiz bundan ibarətdir və bunun üçün çarə yolu fikirləşməliyik.

Mənim nəzərimcə hadisənin ən mühüm amili iki şeydən ibarətdir: 1-Öz əxlaqi və mə`nəvi xəstəliklərimizi tanımırıq, ruhən xəstə olduğumuzu e`tiraf etmirik. 2-Əxlaqi və ruhi xəstəlikləri kiçik sayırıq, onların pis nəticələrindən və acınacaqlı aqibətindən qafilik. Buna görə də onları müalicə etmək üçün ciddi-cəhdlə sə`y göstərmirik. Məhz bu iki amil səbəbilə biz nəfsin islah edilməsi və saflaşdırılmasından qafil oluruq. İndi isə bu barədə müəyyən qədər bəhs edib müalicə yollarını araşdırırıq.

XƏSTƏLİKDƏN QAFİLLİK

Biz əxlaqi xəstəlikləri adətən tanıyır, onların çirkinliyini dərk edirik, lakin özümüzdə yox başqalarında. Əgər başqalarında müəyyən bir pis əxlaq, yaxud pis rəftarı görsək onun çirkinliyini yaxşı-yaxşı dərk edirik, halbuki həmin çirkin sifətin, bəlkə də ondan artığının bizdə olduğu halda ümumiyyətlə ona diqqət yetirmirik. Məsələn başqalarının hüququnu tapdalamağın pis iş olduğunu bilirik, təcavüzkara nifrət edirik, halbuki özümüzün də təcavüzkar olmağımız mümkündür, lakin ümumiyyətlə təcavüzkar olduğumuzu dərk etməyə bilərik. Öz işimizi ümumiyyətlə təcavüz hesab etmirik, bə`zən də onu dəyərli və əxlaqi bir əməl kimi özümüzə təlqin edir, bununla da öz nəfsimizi, vicdanımızı qane edirik. Həmçinin sair çirkin sifətlər də eynilə. Buna görə də heç vaxt özümüzün islah edilməsi fikrinə düşmürük, çünki bir kəs özünü xəstə hesab etməzsə müalicə fikrinə də düşməz. Biz özümüzü xəstə hesab etmədiyimiz üçün müalicə fikrinə də düşmürük, bizim ən böyük çətinliyimiz də elə budur. Deməli öz xoşbəxtlik və səadətimizin fikrində olsaq gərək mümkün olan hər bir vasitə ilə bu çətinliyin həll edilməsi və nəfsani xəstəliklərimizin tanınmasına çalışaq.

NƏFSİN XƏSTƏLİKLƏRİNİN AYİRD EDİLMƏSİ YOLLARİ

Özümüzün müxtəlif nəfsani xəstəliklərimizin tanınmasında istifadə olunası müəyyən vasitə və yolların qeyd edilməsi yerinə düşərdi:

1-Əql qüvvəsinin gücləndirilməsi. İnsanın mələkuti və ali mərtəbəsi, onun sair məxluqlardan seçilməsində imtiyazın mənşəyi olan vücud varlığının ən kamili Qur`an və hədislərdə müxtəlif adlarla qeyd olunmuşdur: ruh, qəlb, nəfs və əql. Bunların hamısı vahid bir həqiqəti göstərir, lakin müxtəlif səbəblərə görə müxtəlif cür adlandırılmışdır. Həqiqi təfəkkür və düşüncənin mənşəyi olduğuna görə əql adlandırılır.

Hədis kitablarında əqlə çox böyük imtiyaz verilir. Hətta xüsusi bir fəsil də bu məsələyə məxsus edilmişdir. Hədislərdə əql varlıqların ən şərafətlisi, təklif, savab və cəzanın mənşəyi kimi təqdim edilmişdir. Nümunə üçün:

İmam Muhəmməd Baqir (ə)buyurub: “Allah əqli yaratdıqdan sonra onunla danışıb dedi: “Gəl”. Əql itaət edib gəldi, sonra buyurdu: “Qayıt”. Yenə də itaət etdi. Sonra buyurdu: “Öz izzət və cəlalıma and olsun! Elə bir varlıq yaratmamışam ki, səndən yaxşı və sevimli olmuş olsun. Səni yalnız sevdiyim kəslərdə kamil edərəm. Agah ol! Mənim əmr və nəhyim sənə doğru yönəlib, sənə də savab verib yaxud cəzalandırıram.”[1]

İnsan məhz əqlin vasitəsilə düşünüb həqiqətləri dərk edir, yaxşı ilə pisi, faydalı şeylə zərərli şeyləri bir-birindən ayırır, məhz əql vasitəsilə Allahı və özünü tanıyır, vəzifəsinin nə olduğunu ayırd edir. Əgər insanın əqli olmasaydı onunla sair heyvanlar arasında heç bir fərq olmazdı. Məhz buna görə də Mütəal-Allah Qur`ani Kərimdə təəqqül, təfəkkür, təəmmül və təfəqqüh barəsində tə`kid edir, insandan öz varlığında əqlini fəallaşdırmasını istəyir.

Nümunə: “Allah Öz ayələrini sizin üçün belə bəyan edir ki, bəlkə əqlinizi işə salasınız.”[2]

“Nə üçün yer üzündə seyr etmirlər ki, onlar üçün təəqqül edə biləcək qəlblər olsun?!”[3]

“Allahın yanında canlıların ən pisi o kəslərdir ki, lal-kardırlar və əql qüvvəsini işlətmirlər.”[4]

Mütəal Allah əqlə, qulağa, dilə malik olub real gerçəkliklərin, həqəqətlərin tanınmasında onlardan istifadə etməyən şəxsləri heyvanlarla bir cərgədə, hətta onlardan da alçaq səviyyədə təqdim edirik. Çünki onlar öz əql qüvvələrindən istifadə etmirlər.

“Allah çirkinliyi o kəslərə qərar verər ki, əql qüvvəsini işlətmirlər.”[5]

İnsanın malik olduğu bütün yaxşılıqlar onun əqli tərəfindəndir. Əql vasitəsilə Allahı tanıyır, Ona ibadət edir, məadı qəbul edir və onun üçün hazırlaşır, peyğəmbərlərin haqq olduğunu qəbul edir və onlara itaət edir, gözəl əxlaqi səciyyələri tanıyıb, özünü onlar əsasında tərbiyələndirir, çirkin xüsusiyyətləri, rəzillikləri tanıyır və onlardan uzuq olur. Buna görə də Qur`an və hədislərdə əql böyük məqama layiq görülür. Nümunə üçün:

İmam Cə`fər Sadiq (ə)bir nəfərin cavabında buyurdu: “Əql o şeydir ki, onun vasitəsilə Allaha ibadət edilir və behişt kəsb olunur.”[6]

İmam Cə`fər Sadiq (ə)yenə buyurur: “Hər kəsin ağlı olsa dini vardır. Hər kəsin dini olsa behiştə daxil olar.”[7]

İmam Musa ibni Cə`fər (ə)Huşama buyurdu: “Allahın insanlar üzərində iki hüccəti vardır. Onlardan biri zahir, digəri isə batinidir. Zahiri hüccətlər peyğəmbərlər və imamlar, batini hüccət isə əqllərdir.”[8]

İmam Cə`fər Sadiq (ə)buyurur: “Əql baxımından insanların kamili o kəsdir ki, əxlaqı hamıdan yaxşı olsun.”[9]

İmam Cə`fər Sadiq (ə)buyurur: “Əql – mö`minin yol göstərənidir.”[10]

İmam Riza (ə)buyurur: “Hər kəsin dostu onun əqli, düşməni isə onun cəhalətidir.”[11]

Əmirəl-mö`minin Əliyyibni Əbitalibyyibni Əbitalib (ə)buyurur: “İnsanın xudbinliyi onun əqlinin zəifliyini göstərir.”[12]

İmam Musa ibni Cə`fər (ə)Huşama buyurdu: “Hər kəs mal-dövləti olmadan ehtiyacsız, qəlbinin həsəd baxımından aram və dində sağlam olmasını istəyirsə Allahdan onun əqlini kamilləşdirməsini istəyib yalvarsın. Hər kəs ağıllı olsa güzəranını tə`min edəcək miqdarla qənaətlənər. Hər kəs güzəranını tə`min edəcək miqdarla qənaətlənsə ehtiyacsız olacaqdır. Hər kəs güzəranını tə`min edəcək miqdarla qənaətlənməsə heç vaxt ehtiyacsız olmayacaqdır.”[13]

İmam Musa ibni Cə`fər (ə)buyurur: “Əql sahibləri nəinki günahları, hətta dünyanın artıq işlərini belə tərk edirlər. Halbuki dünyanı tərk etmək fəzilət, günahı tərk etmək isə vacibdir.”[14]

Başqa bir hədisdə buyurur: “Əql sahibi heç vaxt yalan danışmaz. Baxmayaraq ki, nəfsi ona meyl edir.”[15]

Başqa bir hədisdə buyurur: “Hər kəsin mürüvvəti olmasa nuru yoxdur. Hər kəsin əqli olmasa mürüvvəti yoxdur. İnsanların ən dəyərlisi o kəsdir ki, dünyanı öz nəfsinin dəyəri bilməsin. Bilin ki, sizin bədənlərinizin qiyməti cənnətdən başqa bir şey olmaz. Onu cənnətdən başqa bir şeylə müamilə etməyin.”[16]

Bu hədislərdən əqlin dəyəri, onun məarif, elm kəsb etməkdə, İman qazanıb Allaha pərəstiş etməkdə, əxlaqi səciyyələrdən istifadə etməklə və onları tanımaqda, günahlardan və çirkin xasiyyətlərdən çəkinməkdəki mühüm rolu mə`lum olur. İndi isə bir zəruri məsələni qeyd etmək lazımdır: sadəcə əqlin varlığı bu mühüm hədəflərin tə`min olunmasında kifayət deyildir; əqli işlətmək və ondan istifadə etmək lazımdır. Bədəndə əqlin varlığı işbilən və ədalətli bir qazinin məsəli kimidir, lakin o vaxt yaxşı mühakimə yürüdüb hökm çıxara bilər ki, aram bir mühit yaranmış olsun və onun mühakiməsi qəbul edilsin. O bilikli, bacarıqlı, tədbirli, xeyirxah bir hakim kimidir, lakin bu şərtlə ki, onun hökmü təsbit edilsin. O bilikli, e`timadlı, xeyirxah bir müşavirdir, lakin bu şərtlə ki, ondan məşvərət istənilsin və sözlərinə düzgün qulaq asılsın.

Əgər əql insana hakim olaraq nəfsani istəkləri və qərizələri normal (mö`tədil) hala salsa insanın “bədən ölkəsini” ən yaxşı şəkildə idarə edəcək, qərizələr və qüvvələr arasında müvazinəti qoruyub saxlayacaq və hər bir şeyi təkamül, Allaha doğru irəliləmək yolunda qərar verəcəkdir. Lakin görəsən heyvani qərizələr və meyllər əqlin hakimiyyətini elə bu sadəlikdə qəbul edərək onun göstərişləri müqabilində təslim olurmu?! Əsla! Heyvani qərizələr və meyllər o qədər təxribatçılıq, fitnə-fəsad törədirlər ki, nəhayət onu meydandan çıxarırlar. Çarəsi də yalnız əqli gücləndirməkdir, çünki o, nə qədər güclü və nüfuzlu olarsa batini düşmənlərini daha yaxşı tanıyar, onların qarşısını alıb məhv etməkdə daha bacarıqlı olar. Əqlin gücləndirilməsi və möhkəmləndirilməsi yolunda çalışmaq hamımızın vəzifəsidir.

2-Əməldən qabaq təfəkkür etmək. Əqlin gücləndirilməsi üçün ciddi qərara gəlməliyik: hər bir əməli yerinə yetirməzdən öncə yaxşı-yaxşı fikirləşək, onun dünyadakı və axirətdəki nəticələrini, əsər və aqibətini araşdıraq və qərara alaq ki, heç vaxt bir işin aqibətini fikirləşmədən onu görməyəcəyik ki, nəticə e`tibarilə təfəkkürə və axır-aqibəti fikirləşməyə adət edək. Buna görə də islam bizi təfəkkürə, axır-aqibəti düşünməyə də`vət edir. Misal üçün:

Əmirəl-mö`minin Əliyyibni Əbitalibyyibni Əbitalib (ə)buyurur: “Təfəkkür vasitəsilə öz qəlbini agah et.”[17]

Yenə buyurur: “Təfəkkür insanı yaxşı işlərə və onlara əməl etməyə də`vət edir.”[18]

Əmirəl-mö`minin Əliyyibni Əbitalib (ə)yenə buyurur: “Bir işi görməzdən qabaq onun axır-aqibətini fikirləşmək səni peşmançılıqdan amanda saxlayar.”[19]

Bir nəfər Peyğəmbəri Əkrəm (s.ə.v.v)-in hüzuruna gəlib dedi: Ya Rəsuləllah! Mənə bir şey tövsiyə et. Buyurdu: Mənim tövsiyələrimə əməl edərsənmi? Ərz etdi: Bəli, ya Rəsuləllah. (Bu sual-cavab üç dəfə təkrar olundu). Sonra Peyğəmbəri Əkrəm ¡buyurdu: “Sənə tövsiyə edirəm ki, hər vaxt bir iş barəsində qərara gəlmək istəsən əvvəlcə onun axır-aqibəti barəsində yaxşı fikirləş. Əgər yaxşı olarsa gör. Əgər səhv olarsa onu yerinə yetirməkdən çəkin.”[20]

Rəsuli Əkrəm ¡buyurur: “Tələsmək insanları həlakətə salır. Əgər insanlar işlərində dərindən fikirləşsəydilər bir kəs həlak olmazdı.”[21]

Peyğəmbəri Əkrəm ¡buyurur: “İşi tə`xirə salıb onun axırını fikirləşmək Allah tərəfindən, tələsmək isə şeytan tərəfindəndir.”[22]

Başqa bir hədisdə buyurulur: “Təfəkkür yaxşışıqları və pislikləri sənə göstərən bir güzgü kimidir.”[23]

Heyvanlar öz işlərində nəfsani istəklərinə və qərizələrinə tabe olurlar, onların təfəkkürü və tədbirləri yoxdur, lakin insanın əqli olduğundan öz işləri barəsində fikirləşməli, onun axır-aqibətini düşünməlidir. İnsanda da həmin heyvani qərizələr və meyllər olduğundan heyvani bir istəklə qarşılaşan zaman dərhal ona tərəf təhrik olunur və qərizələr ona təfəkkür etmək icazəsi vermir. Əql meydana daxil olan kimi onun qarşısını alır. Deməli əgər biz hər bir iş görməzdən qabaq onun barəsində yaxşı fikirləşməyə adət edə bilsək əqlin yerini açmış və ona meydan vermiş oluruq. Əql meydana daxil olduğu zaman bizim həqiqi mənafeyimizi və zərərimizi dərk edir, heyvani qərizə və meylləri normal (müvazinətli) hala salır və bizi bu yolda insani təkamülə doğru hidayət edir. Əql güclənən zaman bədən ölkəsində hakimiyyətə çatır və insaniyyətin daxili düşmənlərini və nəfsani xəstəlikləri bizim öz daxilimizdə araşdırıb onları dəf edir, yaxud müdafiə etməyə başlayır. Buna görə də Qur`anda və hədislərdə təfəkkür barəsində çoxlu tə`kidlər və tövsiyələr gözə dəyir.

3-Nəfs barəsində bədbinlik

İnsan əgər öz nəfsinə dərindən, diqqətlə nəzər salıb nəfsani sifətlərini insafla araşdırsa əksər hallarda özünün nəfsani xəstəliklərini və eyblərini dərk edər. Çünki insan özünə hər kəsdən artıq agahdır. Allah-təala Qur`anda buyurur: “Xeyr, insan öz nəfsinə (nəfsinin yaxşı və pis işlərinə) daha agahdır, baxmayaraq ki, öz bəsirət gözlərinə üzr (pərdəsi) atır.”[24]

Lakin bizim çətinliyimiz budur ki, mühakimə yürüdən zaman bitərəf mövqe seçə bilmirik, əksər hallarda öz nəfsimizə nikbin oluruq. Özümüzü, xasiyyətimizi, iş və rəftarımızı, danışıqlarımızı yaxşı və eybsiz hesab edirik, əmmarə nəfsi heyvani işləri bizim üçün o qədər zinətləndirir ki, hətta pis işləri belə yaxşı görürük. Qur`ani Kərim buyurur: “O kəs ki, onun çirkin əməllərinə zinət verildi və onu yaxşı gördü (onu görmədinmi?!) Allah da hər kəsi istəsə yoldan azdırar, hər kəsi istəsə hidayət edər.”[25]

Buna görə də öz eyblərimizi tapa bilmirik ki, onların müalicəsi fikrinə də düşək. Bunun çıxış yolu budur ki, həmişə öz nəfsimizə qarşı bədbin, bədgüman olaq, çoxlu pisliklərimiz, mə`nəvi xəstəliklərimiz olmasına ehtimal verək, hətta yəqin edək. Məhz bu halda nəfsimizi araşdırarıq.

Əmirəl-mö`minin Əliyyibni Əbitalib (ə)buyurur: “Mö`min həmişə öz nəfsinə bədgüman olmalıdır. Həmişə onun eybini axtarar və ondan yaxşı işləri tələb edər.”[26]

Əmirəl-mö`minin Əmirəl-mö`minin Əliyyibni Əbitalib (ə)müttəqiləri (təqvalıları) vəsf edərək buyurub: “Onların nəfsləri öz yanlarında töhmət və bədgümanlığa mə`ruz qalır və öz əməllərindən qorxurlar. Onlardan biri başqası tərəfindən tə`riflənən zaman (tə`rifdən) qorxur və deyir ki, mən öz nəfsimə hamıdan artıq agaham, Allah da mənə, özümdən artıq agahdır.”[27]

İnsanın öz nəfsani eyblərini, xəstəliklərini tapıb islah etməyə mane olan ən böyük amillərdən biri nəfs barəsində nikbinlik və hüsnü-zən etməkdir. Əgər bu maneələri aradan qaldırıb insafla və eyb ehtimalı verməklə nəfsimizi araşdırsaq onun xəstəliklərini tanıyaraq islah edə bilərik.

4-Ruhani təbibə müraciət etmək.

İnsan öz eyblərini tanımaq üçün öz nəfsini paklaşdıran, özünü bəyənilən əxlaqlarla zinətləndirən əxlaq aliminə müraciət edərək özünün daxili xasiyyətlərini və vəziyyətlərini onun üçün tamamilə şərh edə və onun nəfsindəki eyblərin və çirkin sifətlərin xatırlatmasını istəyə bilər. Ruhani təbib, islami əxlaqşünas və psixoloq, əməl əhli və gözəl əxlaqlarla zinətlənmiş olan bir şəxs insanın nəfsinin aludəliklərdən təmizlənməsində, saflaşmasında və Allah dərgahına doğru seyr etməsində çox tə`sirlidir. Əgər insan belə bir şəxsi tapa bilsə bu böyük ne`mətə görə Allaha şükr etməlidir. Çox təəssüflə, belə şəxslər çox az tapılır.

Qeyd olunmalıdır ki, nəfsin xəstəliklərinin ayırd edilməsi çox çətindir. Deməli ruhu xəstə olan bir şəxs özünün daxili xasiyyətlərini və işlərini örtüb-basdırmadan təbib üçün ətraflı şəkildə bəyan etməlidir ki, təbib onun xəstəliyini ayırd edə bilsin. Əgər xəstə şəxs bu barədə həmkarlıq etməzsə və həqiqətləri açıb deməzsə istənilən nəticə əldə olunmayacaqdır.

5-Xeyirxah və bilikli dosta müraciət etmək.

Yaxşı, bilikli və xeyirxah dost Allahın böyük ne`mətlərindən biridir ki, insan nəfsinin təmizlənməsində, çirkin sifətlərin tanınmasında insana layiqli kömək edə bilər, bu şərtlə ki, bilikli olsun və yaxşı-pis xasiyyətləri tanıya bilsin. Bundan əlavə o, insan üçün xeyirxah və e`timad olunusı bir şəxs olmalıdır. Çünki əgər yaxşı və pis sifətləri ayırd edə bilməzsə insana bu barədə heç bir kömək edə bilməz, hətta çox hallarda yaxşını pis, pisi də yaxşı cilvələndirə bilər. Əgər e`timadlı və xeyirxah olmazsa dostluğun qorunub-saxlanması və dostunun inciməməsinə görə öz dostunun eyblərini gizlətməsi, hətta onun xoşu gəlsin deyə pis işlərini yaxşı cilvələndirib tə`rifləməsi də mümkündür.

Əgər insan belə bir dostu tapsa ona deməlidir ki, gördüyü hər eyb və nöqsanlı vəziyyəti ona xatırlatsın, o da xatırlatdığı təqdirdə ona təşəkkür etsin, öz nəfsinin islah olunması üçün onlardan istifadə etsin. Bu kimi xatırlatmalardan istifadə etmək və təşəkkür etməklə əməldə ona başa salsın ki, eyblərinin xatırladılmasından nəinki narahat deyil, hətta sevinib xoşhal olur da.

Nəzər istənilən belə bir dost gərək əməldə özünün tam sədaqət və ixlasını isbat etsin, məsələyə insafla yanaşıb, məhəbbət və ədavəti kənara qoymaqla dostunun sifətlərini, xasiyyətlərini araşdırsın, onun nəzərinə çarpanları dostcasına və xeyirxahlıq dili ilə onun ixtiyarına qoysun, bu işləri mümkün qədər məxfi şəkildə görsün və onun eybinin başqalarının hüzurunda aşkar etməkdən ciddi şəkildə çəkinsin. Onun yeganə hədəfi həqiqətin izhar edilməsi olmalıdır. O, mübaliğə və şişirtmədən uzaq olmalıdır, çünki mö`min öz din qardaşı ilə müqayisədə, onun eyblərini, yaxud çirkinliklərini artırıb azalmadan göstərən güzgüsü sayılır.

Əlbəttə nəvazişlə, mehribanlıqla və islah etmək məqsədilə insanın eyblərini xatırladan dostlar çox azdır, lakin əgər bir şəxs belə adamı taparsa böyük xoşbəxtliyə nail olur. Şəxs onun qədrini bilməli, xatırlatmalarına sevinməli, onun qarşısında təşəkkür etməli və insanın eyblərinin islah məqsədilə xatırladan bir kimsənin dostların ən yaxşısı və ən faydalısı olduğunu bilməli, heç vaxt onun verdiyi xatırlatmalardan və xəbərdarlıqlardan inciməməli, intiqam almaq və özünü müdafiə etmək məqamına gəlməməlidir. Əgər bir şəxs “sizin paltarınızda bir neçə zəhərli əqrəb vardır” - deyə sizə xəbərdarlıq versə onun verdiyi bu xəbərdən inciyərək intiqam almaq məqamına gələrsinizmi, yoxsa sevinib ona təşəkkür edərsiniz? Çirkin sifətlər də əqrəb kimi hətta ondan da pisdir. Onlar insanın ruhunu sancıb zəhərləyir və həmişə insanın batinində yerləşir. Onların dəf edilməsində kömək edən şəxs bizə ən böyük xidmət etmiş olur.

İmam Cə`fər Sadiq (ə)buyurur: “Qardaşlarımın ən yaxşısı o kəsdir ki, eybimi mənə hədiyyə etsin.”[28]

6-Başqalarının eybindən ibrət götürmək

İnsan əksər hallarda öz eyblərindən qafildir, amma başqalarının eybini görərək onların çirkinliyini yaxşı şəkildə dərk edir. Atalar demişkən “başqasının gözündə tükü görür, öz gözündə isə tiri görmür”. Deməli nəfsani eyblərin tanınma yollarından biri də başqalarının eybləri ilə qarşılaşmaqdır; insan başqasında bir eybi gördükdə onun üzərində dayanmadan, onu tənqid etmək fikrinə düşmədən gərək öz eybini axtarmaq fikrinə düşsün və həmin məqsədlə öz nəfsini araşdırsın, öz nəfsinə müraciət etsin və həmin eybin onda olduğu surətdə islah edib aradan qaldırmaq fikrində olsun. Bu kimi hallarda başqalarının eybini görməklə ibrət alır və öz nəfsinin təmizlənməsinə çalışır.

Peyğəmbəri Əkrəm ¡buyurur: “Xoşbəxt o kəsdir ki, başqalarından ibrət alsın.”[29]

7-Tənqiddən nəticə çıxarmaq.

Dostlar əksər hallarda insanın eybini deməkdən çəkinirlər. Düşmənlər isə bunun əksinə olaraq əksər hallarda insanı tənqid edirlər. Əlbəttə onlar tənqid məqamında sədaqətli deyillər, onları bu işə həsəd, kin-küdurət, intiqamçılıq kimi hislər vadar edir. Hər bir halda insan onların tənqidlərindən öz xeyrinə istifadə edə bilər.

İnsan düşmənlərin tənqidləri müqabilində iki cür əksül-əməl göstərə bilər:

1-Özünü müdafiə məqamına gəlmiş olsun, bu sözlərin düşmən tərəfindən deyilməsini və xeyirxahlıq məqsədinin olmasını bəhanə edərək mümkün olan hər bir vasitə ilə özünü müdafiə etsin və onların səsini boğsun. Belə şəxs nəinki öz eybini islah etməmiş, əksər hallarda xəta və sair səhvlərə də aludə olmuşdur.

2-Düşmənlərin tənqidlərinə yaxşı-yaxşı qulaq assın, sonra həqiqəti axtarıb tapmaq məqsədilə öz nəfsinə müraciət etsin, onu insafla araşdırsın. Əgər düşmənin tənqidinin düzgün və öz nəfsinin eybli olduğunu görsə dərhal onu islah etmək fikrinə düşsün, hətta əgər məsləhət olarsa onun eybini deyərək nəfsinin saflaşdırılmasına səbəb olan düşmənə də təşəkkür etsin. Belə düşmənçilik şübhəsiz insanın eyblərini gizlədərək onu tə`rifləyən, bununla da insanı nadanlıq və cəhalətdə saxlayan mühafizəkar və yaltaq dostlardan çox yaxşı və faydalıdırlar. Amma əgər öz nəfsinə müraciət etdikdən sonra qeyd olunan eyblərin onda olmadığını görərsə Allaha şükr etsin və sonralar belə çirkin sifətlərə aludə olmaması üçün öz nəfsini gözləsin. Belə olan halda insan düşmənlərin tənqidlərindən bəhrələnir. Əlbəttə bu cür rəftarlar insanın xain düşmənlərin hiyləgərlik planlarını əqli və şər`i yollarla zərərsizləşdirməsinə mane olmamalıdır.

8-Qəlbin xəstəliyinin əlamətləri

Xəstəliyi tanımağın ən yaxşı yollarından biri onun əlamətlərinin görünməsidir. Bədəndə mövcud olan əzaların xəstəliyi iki yolla tanınır: ya ağrı hiss edilməklə, yaxud da hər hansı bir üzvün orqanizmdə öhdəsinə aldığı işi yerinə yetirməməsi ilə. Bədən üzvlərindən hər biri sağlam halda bədənin idarə olunmasında xüsusi funksiyanı, öz vəzifəsini lazımınca yerinə yetirir. Deməli əgər hər hansı bir üzv öz vəzifəsini yerinə yetirməkdə aciz olarsa xəstələnməsi mə`lum olur. Məsələn göz sağlam halda və xüsusi şəraitlərdə xaricii əşyaları müşahidə edir. Əgər bu şəraitlərin mövcud olması ilə ya ümumiyyətlə görməzsə, ya da yaxşı görməzsə xəstələnməsi mə`lum olur. Bədənin sair üzvləri, o cümlədən qulaq, dil, əl, ayaq, qəlb, böyrək, qara ciyər və sair hamısının özünə məxsus vəzifələri vardır ki, sağlam halda onu yerinə yetirir, əgər vəzifəsini yerinə yetirməzsə xəstələnməsi mə`lum olur.

İnsanın qəlbi və nəfsi də belədir, müəyyən işləri öhdəsinə almışdır və yaradılış qanunlarına uyğun olaraq onları yerinə yetirməlidir. O, mələkut aləmindən gəlmişdir, elm, rəhmət, qüdrət, ehsan, ədalət, məhəbbət, mə`rifət, nuranilik və sair fəzilətli sifətlər, gözəl əxlaqlar ilə uyğunluğu vardır. O, fitri olaraq hər şeyin səbəbini axtarır, Allahı istəyir. İnsanın Allaha İman gətirib diqqət yetirməsi, Onunla ünsiyyətdə olması, Ona məhəbbət bəsləməsi, Allaha ibadət və pərəstişi, Onunla dua və raz-niyaz etməsi, dərgahında yalvarması, həmçinin elm və biliyə, ehsan və xidmətə meyl, Allah xatirinə Onun məxluqatına xidmət etmək, fədakarlıq edib canından keçmək, ədalət istəmək və sair gözəl əxlaqi səciyyələr nəfsin sağlamlıq əlamətləri hesab olunur. Əgər insan bu qəbildən olan sifətləri özündə görürsə nəfsinin sağlam olduğu mə`lum olur. Amma əgər Allaha diqqət yetirməsə, ibadət, dua və munacatdan ləzzət almasa, bu kimi işlərdən qaçsa, Allahı sevməsə, dünya mal-dövlətinə, məqam və sərvətə, arvad-uşağa, şəhvətə və heyvani ləzzətlərə meyl etməyi Allahın razılığından üstün hesab etsə, həyatda şəxsi mənafeyini tə`min etməkdən başqa bir hədəfi olmazsa, fədakarlıq, ehsan, Allahın məxluqlarına xidmət etməkdən ləzzət almazsa, insanların əzab-əziyyət və narahatlığından narahatlıq hissi və vicdan əzabı keçirməzsə belə bir şəxs nəfsinin doğrudan da xəstə olduğunu bilməlidir. Əgər öz səadət və xoşbəxtliyini istəyirsə mümkün olan tez bir zamanda onu islah edirək müalicə məqamına gəlməlidir.

al-shia, Media-islam.Com 2008.