....::İslam::....

XƏZƏRİN STATUSUNUN MÜƏYYƏN EDİLMƏSİ İLƏ BAĞLI NÖVBƏTİ TOPLANTI ASTANADA KEÇİRƏLƏCƏK

media-islam — Sun, 05 Oct 2008 16:18:52 GMT

Bu görüşdə Xəzərin bütün sahilyanı dövlətlərinin nümayəndələri iştirak edəcək

«Xəzər dənizinin statusunun müəyyən edilməsi ilə bağlı növbəti toplantı bu ilin sonuna qədər Qazaxıstanın paytaxtı Astanada keçiriləcək». Xarici işlər nazirinin müavini Xələf Xələfov «Trend» agentliyinə bu görüşdə Xəzərin bütün sahilyanı dövlətlərinin nümayəndələrinin iştirak edəcəyini bildirib. Onun sözlərinə görə, nümayəndələr konvensiya layihəsi üzərində işi davam etdirəcəklər. /ANS TV/

“Deyerler” AİN (www.deyerler.org)

Azərbaycan qış vaxtına oktyabrın 26-da keçəcək

media-islam — Sun, 05 Oct 2008 13:31:37 GMT

Bu ayın sonunda saatlarda yay vaxtının müddəti başa çatacaq. Avropa ölkələrində oktyabrın son həftəsinin şənbədən bazara keçən gecəsi qış vaxtına keçirilir. Həmin gün saatların əqrəbi 1 saat geri çəkilir. Bu il də oktyabrın 25-dən 26-a keçən qış vaxtı tətbiq olunmağa başlayacaq.

Nazirlər Kabinetindən Lent.az-a verilən məlumata görə, Azərbaycan da qış vaxtına bu il oktyabrın sonuncu bazar günü keçəcək.

Qeyd edək ki, Azərbaycanda yay və qış vaxtlarına keçid 1997-ci ildən Nazirlər Kabinetinin müvafiq qərarı ilə həyata keçirilir.

LENT.AZ

ŞƏRABIN CƏMİYYƏTDƏ YARATDIĞI FƏSADLAR

media-islam — Sun, 05 Oct 2008 13:21:26 GMT

İslamın təlim-tərbiyə sistemində tərk edilməsi vacib buyurulan əsas məsələlərdən biri şərabdır. Şərab-ərəb sözü olub, içki mənasını ifadə edir. Lakin bir termin kimi şərab dedikdə məstedici içkilər nəzərdə tutulur. Biz bu kiçik yazıda öncə şərabın insan həyatına vurduğu ziyanlardan söhbət açacaq, sonra isə məsələni Quran və şəriət baxımından izah etməyə çalışacağıq.

Şərabın ziyanları

Şərab məsələsi müasir dünyamızda çox ciddi problemə çevrilmişdir. Sağlam və xoşbəxt həyat üçün böyük təhlükə hesab olunan bu problem hələ qədim zamanlardan bu günümüzə qədər çoxlu fəlakətlərin əsas səbəbləri olmaqda davam edir. Şərab və keyfiyyətindən asılı olmayaraq bütün məstedici içkilər insan həyatının heç bir sahəsində təsirsiz olmamış, onun ailə-məişət, mədəni-maarif, sosial-iqtisadi və digər bütün sahələrində öz dərin təsirini buraxmışdır.
Spirtli içkilər insanda müxtəlif xəstəliklərin yaranmasına səbəb olur. Bu saysız-hesabsız xəstəliklərə misal olaraq beyin hüceyrələrinin və neytronlarının passivliyini, ürəkdə qan dövranının pozulmasını, bəzi damarların partlaması və qan laxtalanmasını, mədə və bağırsaqlarda yaranan anormallıqları qeyd etmək olar. Bəzən bunlar vətəndaş maarifçiliyi naminə xərçəng xəstəliyi və bədənin iflic vəziyyətinə düşməsi ilə nəticələnir.
Spirtli içkilərin acı təsiri özünü psixi xəstəliklərdə də göstərir. Sərxoş vəziyyətdə insan ağlının fəaliyyətdən düşməsi heç kimə sirr deyil. İnsan şərab içməklə özünün ağıl qüvvəsini əldən verir. Bu isə tədricən yaddaşın pozulmasına, ağıl və şüurun itməsinə səbəb olur, ruhi və psixi xəstəliklərə gətirib çıxarır. İngiltərənin bir şəhərində müxtəlif səbəblər üzündən ağlını itirənlərin sayı 53 nəfər olduğu halda, təkcə spirtli içkilər üzündən bu xəstəliyə tutulanlar 2249 nəfərə çatmışdır.
ABŞ ruhi xəstəxanalarında xəstələrin 86%-i məhz spirtli içkilər üzündən ruhi xəstəliyə düçar olmuşdur. Bu ölkədə bir ildə ruhi xəstəliklərdən ölənlərin sayı II Dünya müharibəsində həmin ölkənin həlak olmuş vətəndaşlarının sayından iki dəfə artıqdır. Onlar əsasən şərab və siqaretin təsiri ilə ruhi xəstəliyə tutulmuş insanlardır.
Fransalı alimlərin araşdırmaları nəticəsində 200 min nəfərin spirtli içkilər vasitəsilə psixi xəstəliyə tutulmaları açıqlanmışdır.
Məstedici içkilərin insan ömrünə də mənfi təsiri vardır. Normal insan ömrü 60 ildən az olmadığı halda şəraba aludə olanların orta ömür müddətləri 35-50 arasındadır. "Ömrün sığortası" kompaniyasının apardığı tədqiqatlardan aydın olmuşdur ki, şərab içənlərin ömür müddətləri başqalarından 25-30% qısa olur.
Şərabın mənfi təsiri insanın 3 nəslinə qədər davam edə bilər. Körpənin nütfəsi bağlanan zaman ata-anadan biri sərxoş olarsa, spirtli içkilərin 35% mənfi təsiri övlada keçir. Əgər onların hər ikisi sərxoş olarlarsa, bu təsir 100%-ə çatır.
Ağıl və düşüncələri zəif olan uşaqların 75%-i spirtli içkilər qəbul edən valideynlərin övladlarıdır.

Övladlarımızın
qanını içməyək!

Yazının bu yerində oxucuların diqqətini bir müddət öncə Rusiya televiziya kanallarının birində nümayiş etdirilən bir verilişə cəlb etmək istəyirik. Bu verilişdə ata və analarının sərxoş olduqlarına görə ölü doğulmuş, şikəst və ya anormal doğularaq ölmüş uşaqlar göstərilirdi. İri kolbalarda yerləşdirilmiş həmin körpə cəsədləri müxtəlif yerlərdə nümayiş etdirilir və şərabın acı təsiri izah olunurdu.

Bəli, insan şərab içməklə həm də övladlarının qanını içmiş olur. İnsan şərab içməklə öz ailəsinin həyatını və öz gələcəyini məhv etmiş olur. Görəsən ölü doğulan və ya anormal doğulub ölən məsum körpələrin nə günahı vardır?! Beşik üzü görmədən torpağa gömülən bu körpələr hansı günahlarına görə öldürülmüşlər?! Görəsən günbəgün şərabın istehsalını artırıb, rəngarəng reklamlarla onu təbliğ edən möhtəkirlər öz vicdanlarını nə ilə qane edirlər?!

Məstedici içkilər ailə münasibətlərinə ciddi zərbə vurur, həyat yoldaşı və övladlara qarşı olan məhəbbəti azaldır. Bunun ardınca isə müxtəlif acı hadisələr - boşanmalar, övladın buraxılması və hətta qətllər baş verir. Sərxoş adam üçün övladı öldürməklə milçəyi öldürmək arasında çox fərq yoxdur. O ən adi bir iş üçün bir anın içində qəzəblənə və ağlagəlməz hadisələr törədə bilər.

Bunlardan əlavə şərabın iqtisadi ziyanı da vardır. Bu ziyanlar insanın həm fərdi, həm də ictimai həyatına şamil olur. Şəraba aludə insanın ailə və uşaqlarının ehtiyacı onun üçün çox da əhəmiyyət kəsb etmir. Onu daha çox şərabla damarlarına işləyən bu mənfur vərdiş düşündürür.

Spirtli içkilərə görə hər il Fransa büdcəsinə 137 milyon frank ziyan vurur. İngiltərədə spirtli içkilərə görə işə çıxmayanların vurduğu ziyan ildə 50 milyon dollara çatır. Bununla isə minlərlə uşaq bağçası, məktəb və xəstəxana tikdirmək olar. Bu pullarla milyonlarla yetimi sevindirmək, pulsuzluq ucbatından işləməyə məcbur olan uşaqlara təhsil imkanı yaratmaq olar.

Niyon şəhər Tibb universitetinin göstərdiyi statistikaya görə, 1961-ci ildə ümumi qətllərin 50%-i, yaralama və fiziki xəsarətlərin 77,8%-i, oğurluqların 88,8%-i məhz spirtli içkilərin təsiri ilə olmuşdur.

Göründüyü kimi, bugünkü bütün elmi-texnoloji nailiyyətlərə baxmayaraq bəşər hələ də düzgün yaşamaq yolunu tapmayıb. Bu gün cinayət və xəstəliklərin sayı şərabxanaların sayı ilə düz mütənasibdir. Bir alim belə deyir: "Əgər dövlətlər öhdələrinə götürsəydilər... şərabxanaların yarısını bağlamaqla, xəstəxana və müalicə mərkəzlərinin yarısını bağlamış olardılar".

İslamdan əvvəl, yəni cahiliyyət dövründə ərəblərin 3 şeyə güclü meyli olmuşdur: şeir, şərab, döyüş. Şərab içmək onlar üçün fəxr və üstünlük hesab olunurdu. Bundan əlavə onların gəlirlərinin bir hissəsi şərab istehsalı və ticarəti ilə təmin olunurdu. Elə buna görə də şərab Qurani-Kərimdə 4 mərhələylə haram buyrulmuşdur. Bu barədə ilk ayə Məkkədə nazil olmuş "Nəhl" surəsinin 67-ci ayəsidir. Bu ayədə Allah-Təala şərabı "gözəl ruzi"nin qarşı tərəfi kimi göstərərək məzəmmət etmişdir. Ayədə deyilir: "Xurma və üzüm ağaclarının meyvələrindən məstedici şərab və gözəl ruzi çəkirsiniz".

Digər ayələr müsəlmanların Mədinəyə hicrətindən sonra hasil olmuşdur. "Nisa" surəsinin 43-cü ayəsində Allah-Təala məst halda qılınan namazın məqbul sayılmadığını bildirdi: "Ey müsəlmanlar! Nə dediklərinizi bilənə kimi məst halda namaza yaxınlaşmayın!"

Ayələrin yalnız namaza aid olmasına baxmayaraq, onda bir növ məzəmmət və ikrah hissi də yaratmışdır. "Nə dediklərinizi bilənə kimi" ifadəsindən məlum olur ki, məst və sərxoş insan dediklərini anlamır və danışdığı sözlərin fərqinə varmır. Bu isə, heç şübhəsiz ki, normal insan üçün böyük qəbahət və eyib sayılır.

Şərabın pis və bəyənilməz iş olması barədə nazil olan 3-cü ayə - "Bəqərə" surəsinin 219-cu ayəsidir. Bu ayə, şərab və qumar haqqında Peyğəmbərə (s) verilən suallara cavab kimi nazil olmuşdur: "Ya Peyğəmbər! Səndən şərab və qumar haqqında soruşurlar. De ki, onlarda böyük ziyan və insanlar üçün (maddi) mənfəət vardır. Lakin ziyanları mənfəətlərindən daha artıqdır".

Göründüyü kimi, Allah-Təala bu ayədə şərabın şəriət baxımından eyib sayıldığını vurğulayıb, onun qəti surətdə haram olunmasına zəmin hazırlamışdır. Müsəlmanların bəziləri heç zaman şərab içməmişdilər. Bəziləri isə bu ayələrdən sonra şərabdan çəkindilər. Amma bəzi müsəlmanlar hələ də şərab içir və köhnə vərdişlərini davam etdirirdilər. Bəzən bu qruplar arasında mübahisələr yaranır, bəziləri şərabın haram, bəziləri isə halal olduğunu söyləyirdilər. Onlar Peyğəmbərin (s) yanına gəlib bu barədə daha açıq və aydın hökmlər istədilər. Bu zaman "Maidə" surəsinin 90-91-ci ayələri nazil oldu: "Ey müsəlmanlar! Həqiqətən şərab, qumar, bütlər və əzlam (cahiliyyət dövründə geniş yayılmış bəxt oyunu) şeytan əməli olan çirkin və murdar işlərdilər. Öz səadət və qurtuluşunuz üçün onlardan çəkinin. Şeytan şərab və qumar vasitəsilə sizin aranızda ədavət və düşmənçilik yaratmaq, sizi Allahın zikrindən çəkindirmək istəyir. (Bütün bu açıqlamalardan sonra) Siz (şərab və qumardan) çəkinməyəcəksinizmi?!"

Bu ayə ilə şərab içmək qəti surətdə haram buyruldu, onun çirkin iş və şeytan əməli olduğu göstərildi. O zamandan etibarən qiyamətə qədər Allaha və Peyğəmbərə imanlı bütün insanlara şərab içmək qadağan olunmuşdur.

Diqqət yetirmək lazımdır ki, qeyd olunan ayələr bütün məstedici və spirtli içkilərin haramlığını bildirir. Belə ki, onların az və ya çox, xalis və ya qarışıq olmaları, habelə insana təsir göstərib-göstərməmələri arasında heç bir fərq yoxdur.

Şərab məsələsi hədislərdə

Həzrət-Məhəmməd Peyğəmbər (s) buyurmuşdur: "Şərab içən şəxs Qiyamət günü üzü qara, ağzı əyilmiş, dili ağzından çölə çıxmış və susuzluqdan fəryad edən halda məhşərə gələcəkdir. Ona zinakarların çirki axıb tökülən quyudan su içirəcəklər".

Peyğəmbər (s) digər bir hədisdə buyurur: "Allah şərabla əlaqədar 10 adamı lənətləmişdir: (Şərab çəkmək məqsədi ilə) üzüm kolu əkəni, onu qoruyanı, üzümü sıxıb suyunu çıxaranı, onu satanı, pulla alanı, pulunu əldə edəni, onu daşıyanı, daşıyanlardan təhvil alanı, camlara süzəni və içəni".

İmam Sadiq (ə) buyurmuşdur: "Şərab içmək bütpərəstlik kimidir. Şərab bütün günahların köküdür".

Həzrət Əlidən soruşdular: "Siz şərab içməyi oğurluq və zinadan da pis hesab edirsiniz?" Buyurdu: "Bəli, zina edən şəxs ola bilsin ki, başqa günahları etməsin, lakin şərab içən şəxs zina da edər, adam da öldürər, namazı da tərk edər".

Göründüyü kimi, şərab həm dini, həm tibbi, həm maddi-mənəvi, həm əxlaqi, həm də ictimai-siyasi cəhətdən zərərlidir.

Gəlin, bu təhlükəli vərdişlə dünya və axirətimizi viran qoymayaq. Gəlin, insanların göz yaşlarına bais olmayaq. Gəlin, Allahın pak nemətlərini murdarlayıb zəhərə çevirməyək. Qoy dünyamız gülüstana çevrilsin!

Elşən İsmayılov

www.islam-azeri.az

TÜRKMƏNİSTAN TÜRKMƏNBAŞININ İRSİ İLƏ VİDALAŞIR

media-islam — Sun, 05 Oct 2008 13:17:27 GMT

Ölkədə ali səlahiyyətli qanunverici hakimiyyət orqanı olan xalq-maslahatı ləğv edən yeni konstitusiya qəbul olunub.

Ölkədə çoxpartiyalı prinsip elan olunub və artıq bütün qanunverici hakimiyyət parlamentə məxsusdur.

Konstitusiyaya düzəliş edilməsi haqqında qərarı ali səlahiyyətli və qanunverici orqan olmuş xalq-maslahat (xalq şurası) qəbul etmişdir. Bu qərar xalq şurasının son qərarı olmuş və bununlada şuranın buraxıldığı bildirilmişdir.

İclas Aşxabaddakı “Ruhiyət” sarayında keçirilmişdir. Xalq-maslahat 2507 nəfərdən ibarət olmuş və onların hər biri şəxsən keçmiş diktator Saparmurat Niyazov tərəfindən təyin edilmişdir. Xalq-maslahatın səlahiyyətlərinə Türkmənistan konstitusiyasının, konstitusyon qanunların qəbul olunması, onlara düzəliş və əlavələrin edilməsi, ümumxalq referendumunun keçirilmə məsələlərinin qərarlaşdırılması, Türkmənistan prezidentinin və məclis deputatlarının seçkilərinin təyin edilməsi, ölkə sərhədlərinin dəyişdirilməsi və Türkmənistanın inzibati bölgüsü məsələləri aid idi. Yeni qərarla bu səlahiyyətlər parlament və prezident arasında bölünüb. Məclis deputatlarının sayının 50 nəfərdən 125-ə çatdırılıb və onlar beş il müddətinə ərazinin bütün əyalətlərindən seçiciləcək. Türkmənistan seçkilər haqqında qanunun əsasında siyasi partiyalara, ictimai birliklərə və vətəndaş qruplarına namizəd irəli sürmək imkanı verilib. Parlament qanunlar qəbul edir, konstitusiya və qanunlara dəyişiklik edir, dövlət büdcəsi və onun istifadə olunması hesabatını təsdiqləyir, ölkə prezidentinin və məclis deputatlarının seşkilərini təyin edir, beynəlxalq razılaşmaları təsdiq və ya rədd edir, sülh, təhlükəsizlik və digər məsələlərə baxır.

Parlament prezidentin xəstə olduğu halda onu vəzifədən kənarlaşdırılması qərarını qəbul edir. Belə bir qərar o zaman qüvvəyə minir ki, bu, müstəqil tibbi komissiya tərəfindən təsdiqlənsin və məclisin müəyyən olunmuş üç üzvü bunun lehinə olsun. Məclis eyni zamanda nazirlər kabinetinin üzvlərindən bu və ya digər səbəblər üzündən hakimiyyətdən uzaqlaşdırılan prezidentin müvəqqəti səlahiyyətlərini kimin həyata keçirəcəyini müəyyən edir.

Prezidentə aid dəyişiklikdən biri: artıq əvvəlki kimi Türkmənistan prezidentliyinə yalnız türkmən seçilmir. Əvvəlki senzura yalnız oturaq həyatla əlaqəli qoyulub. Belə ki, ölkənin ən ali vəzifəsinə yalnız ölkə daxilində son 15 il ərzində yaşamış şəxs seçilə bilər. Ölkə rəhbəri bilavasitə xalq tərəfindən beş il müddətinə seçilir və and içmədən dərhal sonra vəzivəsinin icrasına başlayır.

Konstitusiyanın dəyişidirilməsi qərarı bu ilin aprel ayında prezident Kurbanqulu Berdımuhammedov tərəfindən qəbul olunmuşdur. Saparmurat Niyazovdan sonra ölkəni idarə etməyə başlayan yeni dövlət başçısı Türkmənistanın demokratik bir dövlətə çevirmək istiqamətində bir xətt tutmuşdur.

Yazda o, ölkənin bütün həyat və dövlət sahələrini əhatə edəcək dərin islahatlar başladığını bildirmişdir. Ölkənin əsas qanunlarının formalaşdırılması parlamentə tapşırılmışdır.

Türkmənistan bu günədək 18 may 1992-ci ildə qəbul olunmuş konstitusiyadan istifadə edib. 2003-cü ildə konstitusiyaya düzəliş edilmiş və bununla da xalq-maslahat hakimiyyətin dördüncü budağına çevrilmişdir. Belə bir orqanın yaradılmasını Niyazov ona edilən sui-qəsddən sonra qərarlaşdırmışdır. Türkmənbaşı düşünürdü ki, onun siyasi rəqiblərinə şuranın 2500 nəfərlik üzvi ilə müqayisədə 50 nəfərlik parlament ilə bacarmaq daha rahat olacaq.

MDB-də siyasi proseslərin araşdırılması mərkəzinin rəhbəri Aleksey Vlasovun fikrincə, xalq-maslahatın ləğv edilməsindən sonrakı addım prezident, parlament və hakimiyyətin qarşılıqlı əlaqələrinin yaradılması olacaq. “Bu, hələ siyasi islahatların əvvəlidir”, - deyə o, Qazeta.ru portalına müsahibəsində bildirmişdir. Daha bir addım bir sıra hakimiyyət yönümlü partiyanın yaradılması ola bilər, belə ki, Türkmənistanda çoxpartiyalılıq prinsipi elan olunub.

“Lakin, konstitusiyaya düzəlişin dərhal öz şəklini alacağını gözləməyə dəyməz. İndi artıq görünür ki, Türkmənistan Orta Asiya dövlətlərinin siyasi xətti ilə gedir. Onların hər birində parlament mövcuddur, belə ki, hamısında real hakimiyyət prezidentə məxsusdur. İstisnavi olaraq Qırğızıstanı göstərmək olar. Lakin, Berdumuhammedov artıq Avropa ölkələrinin siyasətinə istiqamət alıb”, - deyə ekspert Vlasov bildirb.

“Deyerler” AİN (www.deyerler.org)

İBLİSİN BUYRUĞUNDA(məqalə)

media-islam — Sun, 05 Oct 2008 13:14:24 GMT

Unutmaq lazım deyildir ki, indiki Amerika milləti on milyonlarla məhv edilmiş yerli hindlilərin sümükləri üzərində yaranmışdır. Müstəmləkəçi ideoloqların yazdıqlarına rəğmən yırtıcı Avropa kolonistləri bu ölkəyə qədəm qoymamışdan əvvəl hindlilər torpaqların becərilməsində yüksək nailiyyətlər əldə etmişdilər. Avropanın bütün ölkələrindən sel kimi axıb gələnlərin içində əlbəttə ki, kübar, əsl-nəcabəti olan adamları barmaqla saymaq olardı. Öz doğma vətənlərində yaşayarkən müəyyən qayda-qanunlara, əxlaq normalarına riayət edənlər Amerikaya ayaq qoyan kimi əsl yırtıcıya döndülər. Qısa müddətdə varlanmaq imkanı qazanmış avropalılar elə ilk saatdan yerli sakinləri - hindliləri qırmağa başladılar. Silah gücünə məhv edilməyən qəbilələri isə sonralar zəhərli spirtli içkilər, sağalmaz xəstəliklərin mikrobları ilə yoluxdurulmuş ədyalların köməyi ilə ölümə məhkum edirdilər. Əlbəttə ki, yerli sakinlər müqavimət göstərirdilər, amma adi yay-ox, balaca tomoqavk ilə top-tüfəngin qarşısına çıxmaq müşkül məsələ idi. Ümumi hesablamalara görə, XX əsrin əvvəllərinə kimi Amerikada məhv edilmiş hinduların ümumi sayı yüz milyona çatır. Bu rəqəmə fikir verin! 1774-cü ilə kimi isə ABŞ-a Afrikadan bir milyona qədər qula döndərilmiş zənci daşınmışdı. XVIII əsrin ikinci yarısında ABŞ-ın şərq ştatlarında hər altıncı sakin qaradərili qul idi. İndi bu iblis imperiyasının qarşısında quyruq bulayanlar niyə demirlər ki, 1924-cü ilə qədər qüvvədə olan qanunlara görə yerli əhali - hindular ölkənin vətəndaşı hesab edilmirdilər! Rəzalətə fikir verirsinizmi, səlib dünyasının tör-töküntüləri gəlib bütöv bir qitəyə sahib çıxırlar və onun yiyələrini də vətəndaşlıqdan məhrum edirlər.

İşğala məruz ərazilərdə qırılan günahsız körpələrin sayı gizlədilir

İndi bu başkəsənlərin, quldurların törəmələri kürreyi-ərzə ağalıq etmək istəyirlər. Hindlilərin yetim qalmış uşaqlarını rezervasiyalarda az qala iki ayaqlı, dilsiz-ağızsız qoşqu heyvanına döndərənlərin xələfləri Vyetnamda dinc əhalini, körpələri, qocaları napalm ilə yandıranda mən təəccüblənmədim. Cənub-şərqi Asiyanın əfsanəvi meşələrinə minlərlə ton zəhərli maddə səpələnəndə beynəlxalq təşkilatlar nə qədər etiraz etdilərsə də xeyri olmadı ki, olmadı. Damarlarında quldar plantatorların qanını gəzdirənlərin nə vecinə ki, Vyetnam xalqının ikinci nəsli hansı dəhşətli xəstəliklərə düçar olacaq. Mən bu sözlərlə bütün amerikalılara qarşı nifrət oyatmaq fikrindən uzağam. Amma Əfqanıstan ərazisində müdhiş bombardmanlar zamanı qəsddən məhv edilmiş qədim Kuşan, Baktriya abidələrini göz qabağına gətirəndə susmaq qeyri-mümkündür. Vəhabi-mason sionist alyansının nəzarəti altında olan müxtəlif çaplı beynəlxalq təşkilatlar, saysız-hesabsız qəzetlər indiyə qədər İraqda, Əfqanıstanda ABŞ hərbçilərinin qətlə yetirdikləri günahsız körpələrin sayını dünya ictimaiyyətindən ciddi-cəhdlə gizlədirlər. Halbuki, iki əsgərinin üstündə İsrail hərbi üstünlüyündən sui-istifadə edərək Livanı xarabazara döndərəndə bütün səlib dünyasından təqdir nidaları qalxdı. Bəli, indi "dünya birliyi" deyəndə ABŞ-ın qlobal imperiyası nəzərdə tutulur. Təkqütblü dünyanın yaranması ilə bəşəriyyət sanki iki min il bundan əvvəlki durumuna yaxınlaşır. İki min il bundan əvvəl qədim Roma tarixə məlum olan bütün ərazilərdə hakimi-mütləq idi. Bütün zəbt edilmiş nəhəng ərazilərdən sərvəti-saman, var-dövlət, istehsal olunan məhsullar sel kimi Romaya axırdı. Qədim Roma da zəli, vampir kimi ölkələrin, xalqların qanını sorurdu. Zirvədə, yuxarı təbəqədə məskunlaşanlar ağlasığmaz cah-cəlal içində eyş-işrətlə ömür sürür, lap alt mərtəbədə olanlar isə cəhənnəm əzabı çəkirdilər.

Mənən cırlaşanların sərvətinə də, torpağına da sahiblənmək asandır

İndi transmilli korporasiyalar tərəfindən təbii sərvətləri tarac edilən Afrika, Asiya ölkələrinin xalqlarının yaşayış səviyyəsini ABŞ-ın əhalisi ilə bir etmək olarmı? Qədim Roma ram edilmiş ölkələri, əraziləri mütəşəkkil hərbi qüvvələrin gücü hesabına saxlayırdısa, indiki müstəmləkəçilərin əllərində daha güclü, daha etibarlı silah var. Nüvə bombaları daşıyan iri təyyarələrin, raketlərin, bütöv donanmanın görə bilmədiyini primitiv musiqi, şou-biznes, heyvani instinktlər aşılayan axmaq teleseriallar görə bilirlər. Türkçülük haqqında boş, bivec laqqırtını qırağa qoyub, çox yox, ikicə gün vaxtını televizorda gedən cahilanə türk seriallarına həsr etsən, hər şey aydın olar. Niyə kişi kimi etiraf etmirik ki, o hörmətsizlik, əxlaqsızlıq, o tərbiyəsizlik, cahillik ki, bu teleseriallarda nümayiş etdirilir, heç bir vaxt sovet kinorejissorlarının ağıllarına da gəlməzdi. İdeoloji təcavüzü kütlə uzun müddət sezə bilmir. Vay o gündən ki, düşmən milli hissləri qıcıqlandıra bilən bütün nəsnələri, fəndləri işlədə-işlədə əsl iblis niyyətini ört-basdır edə bilir. Elementar vokal sənətindən, musiqi elmindən uzaq, "atası-anası bilinməyən" türk estrada zir-zibili bizim efirə, səhnələrə, hətta toylara da hakim kəsilib. Durub söz deyəndə başlayırlar ki, sən türkçülüyün əleyhinəsən. Zövqü korlanmış, bisavad sürünü başa sala bilmirsən ki, Osmanlı türkünün əsl bakirə milli musiqisi, nəğmələri başqa aləmdir, insan dinlədikcə bir də dinləmək istəyir. Rusiyaya patoloji nifrət bəsləyən məşhur siyasətçi Zbiqnev Bjezinskinin dillərə düşmüş bir kəlamı var: "O gün ki, Qızıl Meydanda cins şalvar geyinmiş cavan görünəcək, elə o gündən də Sovet dövlətinin çökməsi başlayacaq". Dərin mənalı, olduqca müdrik sözlərdir! Söhbət adi şalvardan getmir, o, sadəcə olaraq bizlərə yad olan tamam başqa həyat tərzinin nəinki göstəricisi, həm də atributudur. Beynəlxalq masonçuluq da bizim mənəvi aləmimizə Türkiyə təriqi ilə zərbəni vurdu. Biz unutduq ki, dünya jandarmı rolunu boynuna götürmüş ABŞ xüsusi bağlı məktəblərdə yetişdirdiyi gələcəyin ağalarına başqa mədəniyyət təlqin edir. Unutduq ki, surroqata, düşük, zövqsüz musiqiyə, primitiv ritmlərə uymuş, klassik ədəbiyyatın bir nümunəsini vərəqləməmiş, əcdadının irsindən tam bixəbər gəncliyin yetişməsi isə dünyanı idarə edən masonlara və onların əlaltısı ABŞ-a lazımdır. Mənəvi cırlaşmaya uğramış millətin sərvətlərinə də, torpağına da sahib çıxmaq asandır. Gənclik şikəst edilib sıradan çıxarılanda, millətin müqaviməti də qırılar. İndi bəziləri deyəcək ki, mən bu mövzuda on ildən çoxdur ki, yazıram. Bəli, yazıram, amma çifayda, vəziyyət gündün-günə pisləşir. Maşaallah, şəhərimizin mərkəz hissəsi olduqca gözəlləşib, xarici minik maşınlarının sayı-hesabı yoxdur, o adam yoxdur ki, günün ikinci yarısı zənbilli, çantası dolu evə qayıtmasın, şıdırğı alver gedir... Axşamlar isə o küçə yoxdur ki, orada bir-iki əxlaqsızlıq ocağı tam "anşlaqla" işləməsin, mən hələ çoxuna məlum olun bəzi məkanları demirəm. ABŞ-ın siyasət dəllalları qədim Roma imperiyasının dəfələrlə sınaqdan çıxmış bir təxribat metodunu da müasir dövrdə uğurla həyata keçirirlər. Hər hansı bir ölkədə milli müqaviməti təşkil edə biləcək şəxslər, qurumlar ətrafında qabaqcadan xüsusi əməliyyatlar keçirilir, müxtəlif dedi-qodular, şayiələr yayılır, cəmiyyətdə inamsızlığın yaranması, ziddiyyətlərin başlanması üçün hər şey edilir. Milləti monolit qüvvəyə döndərə biləcək mənəvi nəsnələrə iblisanə məkrlə rəxnə vurulur. Məsələn, Azərbaycanda böyük ustalıqla aparılmış təxribata analoq tapmaq çətin məsələdir. Dədə-baba dinini, imanını, ülvi, müqəddəs nə varsa, xülasə, min ildən çox tarixi olan mənəvi sərmayəni qorumaq istəyənlərə əvvəlcə iranpərəst, bir az sonra təməlçi, daha sonra az qala ekstremist terrorçu damğası vurdular. Şərqə qənim kəsilmiş müxtəlif fondlardan astronomik məbləğlər alan, səhər yeməyini Praqada, şam təamlarını Parisdə həzm-rabedən keçirdən, doğmalarından ora-bura "donos" yazanlar isə vətənpərvər kimi xalqa sırındılar. Maraqlısı da bu idi ki, özlərini qeyrət mücəssəməsi sayan müxalifət qəzetlərinin bəzi mühərrirləri də bu tələyə düşdülər. Burda hər addımda "priton" açılırdı, bunlar isə özlərinə əl qatmışdılar ki, "ay haray, qoymayın, Ərdəbildə filan qəzeti bağlayıblar". Burda telekanallar millətin olan-qalanını istehza hədəfinə döndərib əsl mənəviyyatsızlıq təbliğ edirdilər, bu gülməşəkərlər isə İranda hansısa havalanmışın təsadüfən ağzından qaçırdığı sözə səhifələrlə şərhlər verirdilər. Burda yerli rüşvətxor və harın məmurların, icra başçılarının günahı üzündən maddi mədəniyyət abidələri birdəfəlik yer üzündən silinirdi, bu başabəla vətənpərvərlər Təbrizin Ərk qalasından danışırdılar. Şuşa, Xocalı, Kəlbəcər, Ağdam, qan-namus qisası isə unudulur. Bu dəqiqə hansı tinə çıxsan, hansı mağazaya girsən hamı Röyanın toyunun kassetlərini axtarır. Bilirsiniz də kimi deyirəm? Bəs hardasınız ay qeyrət dağarcıqları, niyə qəzəbnak olmursunuz?

Firuz Haşımov

VACİB OXUNMALI

media-islam — Sun, 05 Oct 2008 07:25:00 GMT

SAYTIMIZ BİR MÜDDƏT BU ADLA FƏALİYYƏT GÖSTƏRƏCƏK

WWW.AL-SHIA.MY1.RU

HÖRMƏTLƏ MÜDRİYYƏT

İLİN SONUNA KİMİ DÖRD MİLYARD İNSAN MOBİL TELEFON SAHİBİ OLACAQ

Nisa — Sun, 05 Oct 2008 07:05:29 GMT

BMT-nin proqnozlarına əsasən 2008-ci ilin sonuna qədər dörd milyard insan mobil telefona malik olacaq. Beləliklə, yer kürəsinin 6,7 milyard əhlisinin 61 faizi simsiz rabitə imkanına malik olacaq, Lenta.ru xəbər verir.

Hazırki vaxtda artıq 4 milyard mobil əlaqə abonenti qeydə alınıb, belə ki, abonentlərin sayı, mobil telefon sahiblərinin sayına uyğun gəlmir. İnkişaf etmiş ölkələrdə bəzi simsiz telefon istifadəçiləri birdən çox müqaviləli əlaqəyə malikdir.

Ümumilikdə Braziliya, Rusiya, Hindistan və Çində ilin sonuna kimi birgə 1,3 milyard mobil abonent olacaq. Yalnızca Çində 2008-ci ilin ortalarında 600 milyon mobil əlaqə abonenti qeydə alınıb. Hindistanda 296 milyon mobil müqavilə qeydiyyatdan keçib. Rusiya və Braziliyaya aid dəqiq məlumatlar göstərilməsə də onların sayının 100 və 200 milyon arasında olduğu bildirilir.

İldən-ilə orta hesabla simsiz əlaqə abonentlərinin sayı dünya üzrə hər il üçün 24 faiz artacaq. Əsrin başlanğıcında mobil telefon yalnız yer əhalisinin 12 faizində olub.

Britaniya yevangelistləri bloqerlərin 10 ehkamını qeyd edib

Britaniya yevangelistləri bloqerlərin davranış qaydalarına həsr olunmuş 10 ehkam hazırlayıb. Qanunlar toplusu Londonda konfransda Böyük Britaniyada milyondan çox inanclını özündə cəmləşdirən Yevangelist təşkilatı tərəfindən təqdim edilmişdir, Lenta.ru xəbər verir.

Bloqerlərə aid 10 ehkam aşağıdakı kimi səslənir:

    * Özündən yüksək bloq yaratma
    * Bloqu kumirə çevirmə
    * Öz nikindən sui istifadə etmə, hər halda anonimlikdən istifadə edin
    * Şənbə gününü yadda saxlayın, həftədə bir gün bloqdan istifadə etməyin
    * Digər bloqerləri özünə nisbətən daha çox oxu
    * Digərlərinin mənliyini, nüfuzunu, hisslərini öldürmə
    * İnternetdən kənar işlərlə məşğul olma
    * Digərlərin məzmununu oğurlama
    * Digər bloqerlər haqqında yalançı şahidlik etmə
    * Özün üçün digər bloqerlərin reytinqini arzulama

İPOTEKA DÜYÜNÜ NİYƏ AÇILMIR?

Nisa — Sun, 05 Oct 2008 06:48:21 GMT

1 il 4 ay fasilədən sonra ipoteka məsələsi yenidən aktuallaşıb. Gənclər və idman naziri Azad Rəhimov mətbuata bildirib ki, gənclərin ev problemini həll etmək üçün aşağı faizli, ilkin ödənişsiz və uzunmüddətli ipoteka kreditlərinin verilməsinə çalışırlar. Nazirin sözlərinə görə, gənc ailələrə kömək məqsədilə dövlət büdcəsində artım gözlənilir: “2009-cu ilin dövlət büdcəsində bu məqsədlə daha böyük vəsait ayrılacağını gözləyirik və inanırıq. Sözsüz ki, gənclərimiz bu vəsaitdən səmərəli istifadə üçün yararlana biləcəklər”.

Xatırladaq ki, dövlət hesabına ipoteka kreditlərinin verilməsi ötən ilin iyun ayında dayandırılıb. O zaman Mill Bank (MB) müvəkkil banklara göndərdiyi məktubda ipoteka kreditlərinin verilməsinin 1 ay müddətinə təxirə salındığını bildirirdi. Üstündən 1 il 4 ay keçməsinə baxmayaraq, ipoteka kreditləşməsində sükut hələ də pozulmayıb. Milli Bank əvvəlcə ipoteka kreditləşməsinə bu ilin birinci rübündən, sonra ikinci yarısından başlanacağını bildirsə də, nəinki bu baş verib, hətta ipoteka şərtləri də dəqiqləşməyib. Müstəqil ekspertlərin fikrincə, ipoteka kreditlərinin verilməsinin yubadılmasının iqtisadi əsasları yoxdur. Yayılan məlumatlara görə, ipoteka kreditlərinin bu ildə verilməsinin yubadılmasında yeni modelə keçid məsələsi də rol oynayır. Hazırda Azərbaycanda elə ipoteka modeli yaratmağa cəhd edilir ki, bunun əsasında həm ipoteka modeli, həm də bank sistemi işlək vəziyyətdə ola bilsin. Bu məqsədlə İpoteka Fondu (İF) Danimarka, Meksika kimi bir sıra ölkələrin ipoteka modellərini öyrənib.

2008-ci ildə nəzərdə tutulan vəsait İpoteka Fondunun ötənilki borclarının ödənilməsinə yönəldilib

İqtisadi Sosial İnkişaf Mərkəzinin (İSİM) rəhbəri Vüqar Bayramovun sözlərinə görə, dövlət büdcəsi vəsaitləri hesabına ipoteka kreditlərinin verilməsi nəzərdə tutulsa da, 2008-ci ildə prosesə başlamaq mümkün olmadı: “Əslində 2009-cu ildə ipoteka kreditlərinin verilməsinin mümkünlüyündən öncə, 2008-ci ildə ipoteka kreditlərinin nə üçün verilməməsinə diqqət yetirmək lazımdır. 2007-ci ildə Milli Bank müvvəkil banklara ipoteka kreditləşməsinin dayandırılması ilə bağlı məktub göndərəndə orada prosesin 1 ay müddətinə təxirə salındığı qeyd olunurdu. Daha sonra bəlli oldu ki, ilin sonuna qədər ipoteka kreditlərini vermək mümkün olmayacaq və Milli Bank 2008-ci ilin dövlət büdcəsində ipoteka kreditlərinin verilməsi ilə bağlı xərc maddəsinin nəzərdə tutulduğunu bildirdi. Bununla da 2008-ci ilin mart ayında ipoteka kreditlərinin veriləcəyinə dair rəsmi açıqlama yayıldı. Güman edilirdi ki, mart ayına qədər Maliyyə Nazirliyi kreditləri Milli Bank nəzdindəki İpoteka Fondunun hesabına köçürəcək. Lakin mart ayında bəlli oldu ki, kreditlər verilmir. Bundan sonra isə Milli Bank 2008-ci ilin ikinci yarısında ipoteka kreditlərinin bərpa olunacağını bildirdi. Amma sonradan bəlli oldu ki, may ayında Maliyyə Nazirliyi ipoteka kreditləşməsi üçün dövlət büdcəsində nəzərdə tutulan 34 milyon manatın 10 milyon manatını İpoteka Fonduna ayırıb. Fond isə həmin məbləği ipoteka kreditlərinin verilməsinə deyil, 2007-ci ildə müvəkkil banklar tərəfindən verilən ipoteka kreditlərinin yenidən maliyyələşməsinə yönəltdi. Bu isə 2008-ci il üçün nəzərdə tutulan vəsaitin məhz 2007-ci il üçün İpoteka Fondunun borclarının ödənilməsinə yönəldilməsi deməkdir”.

Fond iki ildir daha çox turizmə görə məşhur olan ölkələrin təcrübəsini öyrənir

Ekspert bildirir ki, MB-in ipoteka kreditlərinin verilməməsi ilə bağlı arqumentləri ilə razılaşmaq mümkün deyil: “Milli Bank kreditləşməni dayandırdığını yeni sistem öyrənilməsi ilə izah edir. Qurumun açıqlamasına görə, İpoteka Fondu bir sıra ölkələrin təcrübəsini öyrənir. Bu təcrübə öyrənildikdən sonra qurumun özünün maliyyələşdirmə prinsipi ilə işləyib-işləməməsi müəyyənləşdiriləcək. Əvvəla, İpoteka Fondu iki ilə yaxındır ki, müxtəlif ölkələrin təcrübəsini öyrənir. Xatırladım ki, 2007-ci ildə Fondun ekspertləri ABŞ-da səfərdə oldular. Daha sonra isə Litvaya səfər edib, həmin ölkənin təcrübəsini öyrəndilər. Amma maraqlıdır ki, Milli Bank və İpoteka Fondu həmin ölkələrin təcrübəsini tətbiq etmək əvəzinə 2008-ci ildə Meksikanın təcrübəsini öyrənməyə başladı. Halbuki, Meksika ipoteka kreditlərinin verilməsi baxımından neqativ ölkələrdən biridir. O baxımdan Milli Bank, eyni zamanda İpoteka Fondu ipoteka kreditlərinin verilməsində hər hansı təcrübəyə malik olmayan ölkələri öyrənir”. Həmin dövlətlərin ipoteka kreditləşməsindən daha çox turizmə görə məşhur olduqlarını diqqətə çatdıran V.Bayramov bildirir ki, son ilyarım ərzində AİF işçiləri müxtəlif ölkələrə səyahət etsələr də, 2008-ci ilin dövlət büdcəsindən ipoteka kreditləşməsi üçün nəzərdə tutulan ipoteka kreditlərini vermək mümkün olmayıb: “2007-ci il iyunun 14-dən ipoteka kreditlərinin verilməsi dayandırılıbsa və İpoteka Fondu həmin müddətdən sonra vətəndaşlara 1 ipoteka krediti də verməyibsə və yaxın aylarda bunu nəzərdə tutmursa, o zaman bu qurumun saxlanmasına ehtiyac varmı sualı ortaya çıxır. Bu gün İpoteka Fondu dövlət büdcəsinin vəsaiti hesabına saxlanılır. Əgər fond 2006-cı və 2007-ci ilin 1-ci yarım ilində verilən kreditlər üzrə ödənişlərin qaytarılmasına nəzarət edirsə, buna da ehtiyac yoxdur. Çünki həmin kreditlər müvəkkil banklar tərəfindən verilib. Banklar faizlərin hesablanmasına və geri alınmasına məsuldurlar”.

Tikinti holdinqləri ipoteka kreditlərinin verilməməsində maraqlıdır

İqtisadçı deyir ki, ipoteka kreditlərinin verilməməsi Meksikanın və ya hansısa turizm ölkəsinin təcrübəsinin öyrənilməsi ilə bağlı deyil: “Bunun kifayət qədər subyektiv səbəbləri var. Dövlət büdcəsi vəsaitləri hesabına ipoteka kreditlərinin verilməməsində bir sıra tikinti holdinqləri maraqlıdır. Çünki tikinti şirkətləri kifayət qədər geniş kredit kampaniyaları həyata keçirirlər. Xatırlatmaq yerinə düşərdi ki, 2007-ci ilin 23 yanvar tarixində prezidentin imzaladığı ”Azərbaycan Respublikasında güzəştli kreditlərin verilməsi qaydaları" haqqında fərmana əsasən ölkədə sosial ipoteka kreditləri tətbiq edilir. Bu kreditlər 3 ildən 30 ilədək olmaq şərti ilə 4 faizlə verilir. Hələlik faiz dərəcələri və müddət dəyişdirilməyib. Bu isə o deməkdir ki, əgər 2008-ci ildə dövlət büdcəsindən ipoteka kreditlərinin verilməsi üçün nəzərdə tutulan vəsait ayrılsaydı, inhisarçı tikinti şirkətlərinin kredit proqramlarının işləməsinə əngəl törədərdi. Tikinti şirkətləri 25 il müddətinə minimum 500 manatdan başlamaq şərti ilə kredit proqramları təklif edirlər. 1 otaqlı mənzil almaq üçün vətəndaş 150 min manat vəsait ödəməlidir. Bu, kifayət qədər böyük rəqəmdir. İpoteka kreditləşməsində isə tamamilə fərqlidir".
Ekspertin sözlərinə görə, ipoteka kreditləşməsinin bərpasına qarşı tikinti monopoliyası kifayət qədər ciddi mübarizə aparır: “Digər problem Milli Bank narazılar faktorunu nəzərə alaraq prosesə başlamamasıdır. Təsəvvür edin, büdcədən bu istiqamətə 34 milyon manat vəsait ayrılmışdı, onun 10 milyon manatını İpoteka Fondu köhnə borclara yönəldib. Nazirlər Kabinetinə təqdim edilən layihədə təklif olunurdu ki, sosial ipotekalar üçün maksimum məbləğ 35 min manatdan 50 min manata qaldırılsın. Bu isə o deməkdir ki, 2008-ci ildə nəzərdə tutulan ipoteka kreditləri 50 min manat olmaq şərti ilə verilsəydi, ən yaxşı halda bundan 480 nəfər istifadə edəcəkdi. Amma ipoteka kreditlərinə olan tələbatı nəzərə alsaq, bu rəqəm 480 nəfərdən daha çoxdur. Milli Bank həm də bu il seçki ilinin olduğunu düşünərək ipoteka kreditləşməsini bərpa etmədi ki, narazı qalanların sayını artırmasın”.
V.Bayramov prosesin bərpa edilməməsinə səbəb kimi həmçinin MB-da, AİF-də kreditlərin verilməsiylə bağlı strategiyanın olmamasını görür: “Milli Bank 2009-cu ildən AİF-in özünü maliyyələşdirmə prinsipi ilə işləyəcəyini bildirir. Amma özünü maliyyələşdirmə prinsipinin nədən ibarət olduğu hələlik fonda aydın deyil. Baxmayaraq, AİF özünü maliyyələşdirmə prinsipi üzrə Litva təcrübəsini tətbiq etmək istəyirdi. Lakin sonradan bəlli oldu ki, İpoteka Fondunun öyrəndiyi, Litvada tətbiq edilən mexanizm Azərbaycanda işləməyəcək. AİF-in özünü maliyyələşdirmə prinsipi əsasında işləməsi kifayət qədər absurd, qaranlıq məsələdir. Təəssüf ki, Milli Bank AİF-in özünü maliyyələşdirmə prinsipi ilə işləyəcəyini əsas gətirərək, prosesi yubadır”.

2009-cu ildə ipoteka kreditləşməsinə böyük vəsait nəzərdə tutulmur

İSİM rəhbəri Milli Bank 2009-ci ildən kreditlərin veriləcəyi ilə bağlı son açıqlamasını səmimi saymır: “Çünki kreditlərin verilməsiylə bağlı Milli Bank, o cümlədən AİF əhalini bir neçə dəfə aldadıb. Proses o qədər dalana dirənib ki, ipotekaya tələbat böyük olsa da, bu məsələ gündəmdə olan mövzulardan deyil”.
Ekspert hesab edir ki, növbəti ildə kreditlərin bərpası üçün həm hüquqi, həm də iqtisadi əsas var: “İqtisadi əsas ondan ibarətdir ki, Milli Bank 2008-ci ildə nəzərdə tutulan kreditləri vermədiyi üçün həmin vəsait AİF-in büdcəsindən qalıq kimi 2009-cu ilə keçəcək. Eyni zamanda güman edilir ki, Nazirlər Kabineti ilin sonunda sosial ipoteka kreditlərinin verilməsiylə bağlı layihəni təsdiq edəcək. Bununla da sosial ipotekaların verilməsi üçün hüquqi baza olacaq.
2009-cu ildə dövlət büdcəsindən ipoteka kreditləşməsinə vəsaitin ayrılacağı gözlənilsə də, bununla bağlı dəqiq məlumat yoxdur. Kreditləşmə dövlət büdcəsində invenstisiya maddəsindədir. Yalnız layihə parlamentdə müzakirə edilən zaman ipoteka kreditləşməsinə vəsaitin ayrılıb-ayrılmaması, o cümlədən məbləğlə bağlı aydın təsəvvür yaranacaq. Amma güman etmirəm ki, 2009-cu ildə dövlət büdcəsində ipoteka kreditləşməsinə vəsait bu il nəzərdə tutulandan artıq ayrılsın. Ən azı ona görə ki, 2008-ci ildəki vəsait xərclənməyib. Digər tərəfdən növbəti ilin büdcəsi bu ilin büdcəsindən daha pessimistdir. Baxmayaraq, 2009-cu ilin büdcəsi həcm etibarilə böyükdür, amma neftin dünya bazar qiymətindəki son azalmalar 2009-cu il üçün 2008-ci ildəki kimi heç də optimist vədlər vermir. 2009-cu ildə bir sıra sosial layihələr üzrə qayçılanmalar həyata keçirilməsi gözləniləndir. Qayçılanan layihələrdən birinin də ipoteka kreditləşməsinin olacağı daha çox güman edilir. Növbəti ildə kreditləşmə bərpa edilsə belə, əhaliyə böyük həcmdə ipoteka kreditlərinin veriləcəyini düşünmürəm".

Sosial ipotekaların faiz dərəcəsi 2 dəfə artırılacaq

“Kreditlərin hansı faizlə veriləcəyi də müəyyənləşdirilməyib” deyir ekspert. Onun sözlərinə görə, MB sosial ipoteka kreditləri üçün faiz dərəcəsinin qurumun uçot stavkasına uyğunlaşdırılmasıyla bağlı NK-ya təklif verib: “Sosial ipoteka kreditlərinin faiz dərəcəsi 4 faizdən 15 faizə yüksələ bilər. Əslində büdcə vəsaiti hesabına verilən kreditlərin Milli Bankın uçot stavkasına uyğunlaşdırılması məntiqi deyil. Son məlumatlara görə, Nazirlər Kabineti Milli Bankın sözügedən təklifini qəbul etməyib. Digər tərəfdən İqtisadi İnkişaf Nazirliyinin proqnozlarına görə, növbəti il inflyasiya 15 faizdən az olacaq. O zaman sosial ipoteka kreditinin bu faizlə verilməsi absurddur. Bütün hallarda bildirilir ki, sosial ipoteka kreditlərinin faiz dərəcələri dəyişdiriləcək. Hələlik bu kreditlərin faiz dərəcəsinin iki dəfə artırılacağı güman edilir. Qeyri-rəsmi məlumatlara görə, sosial ipoteka kreditləri 2007-ci ildə təklif olunan adi ipoteka kreditləri ilə eyni faizlə veriləcək. Maksimum faiz 8 faiz olacaq”. Leyla ƏLİYEVA /yeni musavat/

Ermənilərin Tərtərçaya çirkli su buraxması, Tərtər və ətraf rayonlara ziyan vurub

Nisa — Sun, 05 Oct 2008 06:24:54 GMT

Ermənistan silahlı qüvvələri tərəfindən işğal olunmuş ərazidə yerləşən Tərtərçayına çirkli su buraxılması Tərtər və ətraf rayonların kənd təsərrüfatına ziyan vurub. Tərtərçay İcra Qovşağının İstismar İdarəsinin baş mühəndisi Mehman Kərimovun ANS PRESS-ə verdiyi məlumata görə, 20 gündən artıqdır ermənilərin çaya buraxdığı sudan istifadə etmək qeyri mümükündür. Belə ki, sudan götürülən nümunə Melorasiya və Su Təsərrüfatı Açıq Səhmdar Cəmiyyətinin laboratoriyasında analiz edilib. Nəticədə suyun istifadə üçün yarasız olduğu təsdiqlənib. Yerli icra hakimiyyətləri Tərtər və ətraf rayonların əhalisinə çayın suyundan istfadə etməmək barədə xəbərdarlıq edib. Belə ki, bu su əkin sahələrində torpağın üst qatını sıradan çıxarır və məhsuldarlığı aşağı salır.

Qeyd edək ki, Tərtərçayın suyundan Tərtər, Bərdə, Goranboy, Yevlax, Ağdam rayonları suvarma məqsədi ilə istifadə edilir. Sakinlərin sözlərinə görə, həmin sudan içən mal qara arasında da təlafat var. Çay İcra Qovşağının İstismarı İdarəsindən verilən məlumata görə, ermənilər 15 ildən artıqdır Sərsəng su anbarında yığılıb qalan lili təmizləmək məqsədi ilə anbarın su tullayıcı qapılarını açıblar. Nəticədə həmin su qatı lil şəklində çaya axır. İndiyə qədər çaydan 5-6 milyon kub metr lilli su axıb. Sərsəng su anbarının ümumi həcmi isə 600 milyon kub metrdir. Çayın çirklənməsinin nə vaxta kimi davam edəcəyi bilinmir.

Hazırda rayonlarda taxın əkini dövrü başlayıb. Lakin çayda suyun çirki olması səbəbindən Tərtər, Goranboy, Yevlax, Ağdam rayonlarının fermerləri sahələrini sulaya bilmirlər. Tərtərdəki artizan quyuları ilə isə taxıl sahələrinin yalnız 20-25 faizini suvarmaq mümkündür.

ANS PRESS

KAŞ BU DÖNƏRİ YEMƏYƏYDİM

media-islam — Sat, 04 Oct 2008 11:23:32 GMT

KAŞ BU DÖNƏRİ YEMƏYƏYDİM

Bismilləhir-rəhmanir-rəhim. Son günlər Bakı şəhərinin dönərxanalarında həddindən artıq məsuliyyətsizlik baş alıb gedir. Bu da bəzi problemlərin gətirib çıxarmasına səbəb olur. Dönərxanalarda bişirilən ətlərin keyfiyyətsiz olduğu aşkarlanıb. Hər hansı bir şəxs həmin dönəri alıb yedikdə başa düşmür ki, bu onun həyatı üçün təhlükəlidir. Əslində dönəri alan şəxsin nə günahı... Bu məsuliyyətsizlik əsasən dönər satan şəxsin üzərinə düşür. Niyə görə alıcı hər hansı problemlərlə üzləşməlidir. Dönərxanalarda ətin əvəzinə bəzən də görürsən ki, başqa əti çörəyin arasına qoyub biz zavallılara satırlar. Başa düşmürlər ki, bu ətlər haramdır və bunların bu işləri yalnış olan bir şeydir.
Son bir həftə ərzində misal olaraq Nərimanov rayonunun ərazisində bir neçə dönərxanalarında toyuq ətinin satışında bəzi problemlər yaranıb. Nəinki Nərimanov rayonu hətta başqa yerlərdə də bu hadisələrlə rastlaşırıq. Olmazmı ki, bu problemlərin heç biri ilə qarşı-qarşıya gəlməyək! Müsəlman ölkəsi olan Azərbaycan xalqı bu problemlərlə üz-üzə qalmamalıdır!. Biz niyə görə öz xalqımıza zülm edirik?!
Tutaq ki, bir ailə dönərxanaların birindən dönər alır. Bu dönəri yedikdən sonra insanın orqanizmində zəhərlənmə baş verir. Həmin zəhərlənən şəxs çıxılmaz vəziyyət qarşısında qalır. Özü-özünə fikirləşir: “Kaş bu dönəri yeməyəydim” deyib heyfslənir. Qalır bu xəstəxanaların yolunda. Nə etmək olar? Biz axı öz xalqımıza zülm etməyi vərdiş eləmişik.
Bir məsələni də vurğulamaq istərdim. Həmin insanın həyatı üçün təhlükəli olan dönərxanalar ki, loru dildə desək “Talpuçkalarda” daha çox rast gəlinir. Antisanitar şəraitdə satılan dönərləri talpuçkaya gələn şəxslər daha çox alırlar. Bu talpuçka qırağı olan ərazilərdə olan dönərxanaları yığışdırılmalı və yaxud yüksək səviyyəli dönərxanalar istifadəyə verilməlidir. Əhaliyə yüksək səviyyədə xidmət göstərilməlidir. Niyə də olmasın!
Mən inanıram ki, yaxın zamanlarda bu cür anlaşılmamazlıq aradan qaldırılacaq və bu cür dönərxanalar yığışdırılacaqdır! Deyə bilərəm ki, ümidimiz tək Allaha qalıb. İnşəallah bu dediklərimi yuxu olaraq qəbul etməyəcəyik! Amin!

İlkin Babazadə
WwW.BiRLiK.AZ