Bu gün Rusiya Atom Agentliyinin nümayəndə heyəti Bakıya gəlir. Tərəflər arasında əsas müzakirə obyekti İrandakı “Buşehr” atom elektrik stansiyasının inşasını başa çatdırmaqdan ötrü tələb olunan, Rusiyaya məxsus avadanlıqların Azərbaycanın gömrük orqanları tərəfindən saxlanması olacaq. Rusiya nümayəndələrinin verdiyi məlumata görə, müqavilə üzrə İrandakı “Buşehr” nüvə obyektinə göndərilən yük ixrac nəzarəti prosedurundan tam şəkildə keçməsinə baxmayaraq, hazırda Rusiya tərəfi Azərbaycan gömrüküçüləri və sərhədçilərinin çoxsaylı suallarına cavab verir.
Qeyd edək ki, “Buşehr” nüvə obyektinə lazımi avadanlıqların göndərilməsi BMT-nin İranla bağlı qəbul etdiyi qətnamələrə zidd deyil. Hazırda danışıqlarda irəliləyiş yoxdur. Məsələnin həllində iranlı tərəfdaşlar da iştirak edir.

Xatırladaq ki, bir qədər əvvəl “Rosatom”un rəhbəri Sergey Kiriyenko Rusiyanın “Buşehr” nüvə obyektinə nüvə yanacağının çatdırılmasının fevralda başa çatdırılacağını, bu stansiyada yanacaqla işin isə iyul-avqustda başlanacağını bəyan etmişdi. Məsələ ilə bağlı Azərbaycan Dövlət Gömrük Komitəsi bildirib ki, Rusiya tərəfi həmin yükün Azərbaycan ərazisi ilə İrana ötürülməsi üçün xüsusi icazə təqdim etməlidir. Çünki həmin avadanlıqlar Nazirlər Kabinetinin 42 saylı qərarı ilə müəyyən edilmiş siyahıya daxildir. Buna görə də, xüsusi icazə olmadan həmin yükün buraxılması mümkün deyil.
Xatırladaq ki, Azərbaycanın gömrük və sərhəd xidməti təxminən yarım aydır ki, “Astara” sərhəd keçid məntəqəsində İranda “Buşehr” atom elektrik stansiyasının tikintisini başa çatdırmaq üçün lazım olan istilik izolyasiya avadanlığını iran ərazisinə buraxmır.


ANS TV