İran BMTqətnaməsinə baxmayaraq nüvə proqramını davam etdirəcəyini bildiribİranın Xarici İşlər Nazirliyinin sözçüsü qətnaməni İran xalqına qarşı ədalətsiz təzyiq sayıb
İran beynəlxalq ictimaiyyətin təzyiqlərinə baxmayaraq öz nüvə proqramını davam etdirəcək. Bu fikirləri «Asosşieytid press» xəbər agentliyinə müsahibəsində İranın Xarici İşlər Nazirliyinin sözçüsü Məhəmməd Əli Hüseyni bildirib.
Məhəmməd Əli Hüseyni qeyd edib ki, BMT Təhlükəsizlik Şurasının İrana qarşı tətbiq etdiyi qətnamə İran xalqına qarşı ədalətsiz təzyiqdir: «Ancaq biz çox sərt şəkildə bildiririk ki, bu cür təzyiqlər bizim xalqımızın iradəsini sındıra bilməyəcək. Biz Beynəlxalq Atom Enerjisi Agentliyi ilə bütün məsələləri yoluna qoyduqdan sonra mən bu qətnamənin qəbul edilməsini uşaqcasına atılmış addım hesab edirəm. Onların seçdikləri yol çox yanlışdır və mən bu qətnaməyə səs verənlər üçün yaxşı bir nəticə hasil olacağını gözləmirəm. Onlar səhvə yol veriblər və səhvlərini düzəltməlidirlər».
Xatırladaq ki, BMT-nin Təhlükəsizlik Şurası İrana qarşı yeni qətnamə layihəsini qəbul edib və sənəddə İran rəsmiləri ilə əlaqələrin kəsilməsi, nüvə proqramı və raketlərin rekonstruksiyası ilə əlaqəsi olan şirkətlərlə iqtisadi və siyasi əlaqələrin dayandırlması nəzərdə tutulur. /ANS TV/
