ABŞ prezidenti Beynəlxalq Mətbuat Günü münasibətilə verdiyi bəyanatında söz azadlığının pozulduğu ölkələrin sırasında ilk dəfə Azərbaycanın da adını çəkib
ABŞ prezidenti Corc Buş hər il mayın 3-də qeyd olunan Beynəlxalq Mətbuat Günü münasibətilə bəyanatla çıxış edib. O, söz azadlığının daha çox pozulduğu ölkələri sadalayıb və ilk dəfə olaraq bu dövlətlər arasında Azərbaycanın da adını çəkib.
Buşun bəyanatında deyilir ki, mətbuatın ağzını bağlayan və jurnalistləri həbs edənlər arasında Çin liderlik edir: «Sərt rejimlər azadlığı boğurlar, özəl qəzetləri, radio və telekanalları bağlayırlar. Onlar jurnalistləri oğurlayır, mühakimə edir və döyürlər».
Corc Buş deyir ki, ABŞ jurnalistlərin və bloqqerlərin təqibini, fiziki cəzalandırılmasını və onlara qarşı digər təzyiqləri pisləyir: «Necə ki, bu, Çində, Kubada, Misirdə, Tunisdə, Venesuelada, Vyetnamda edilir. Biz həmçinin Belarus, Livan və Rusiyada jurnalistlərin qətlini pisləyirik».
ABŞ prezidenti bildirir ki, 2007-ci ildə Çin ardıcıl olaraq 9-cu ildir ki, dünyada ən böyük jurnalist həbsxanası olaraq qalır: «Onun ardınca Kuba, Eritreya, İran və Azərbaycan gəlir. Biz bütün ölkələri İnsan Hüquqları Bəyannaməsinin 19-cu maddəsinin prinsipləri, söz və mətbuat azadlığı da daxil olmaqla, öz vətəndaşlarının ayrılmaz hüquqlarına zəmanət verməyə çağırırıq». /"Turan"/
|
