KİTABXANA-Esrin imamı ile elaqedar 15 suala cavab-1

Əsrin imamı ilə əlaqədar on beş suala cavab

Həzrət Məhdi (ə.c.) haqqında verilən suallar çoxdur. Biz bütün bu sualların içərisindən daha mühüm olan on beş sualı seçir və onlara qısa şəkildə cavab veririk:

Sual 1: Qur᾽anda İmam Məhdi Sahibəzzamanla (ə.c.) bağlı ayələr varmı?

Cavab: Bəli. Qur᾽anda bir çox ayələrdə buna işarə edilmişdir. Mə`sum imamlardan bizə yetişən çox saylı rəvayətlərə əsasən, o ayələrin tə᾽vili, yə᾽ni batini mə᾽nası İmamın (ə.c.) hökumətinə işarə edir.

«Qəsəs» surəsinin 5-6-cı, «Nur» surəsinin 56-cı və «Ənbiya» surəsinin 9-cu ayələrini buna misal gətirmək olar.

Nümunə üçün, «Qəsəs» surəsinin 5-ci ayəsində oxuyuruq:

«Biz zəiflədilmiş kəslərə ne᾽mət bəxş etməyi və onları yer üzünün sahibi etməyi iradə etdik.»

Bu ayənin zahiri mə᾽nası həzrət Musanın (ə) qövmü ilə əlaqədar olsa da, batini mə᾽nası həzrətin (ə.c.) hökumətinə işarədir.

Həzrət Əli (ə) buyurmuşdur:

«Bu ayədə Allahın xalqa rəhbər edəcəyi zəiflədilmişlərdən məqsəd, biz Əhli-beytik. Allah bu nəslin Məhdisini (ə.c.) göndərərək, onlara izzət, düşmənlərinə isə zillət bəxş edəcəkdir.»

Nəhcül-bəlağə kitabında da, bu mətləbə işarə olunmuşdur. Həzrət Əli (ə) bu kitabda buyurmuşdur:

«Dünya, fitnə-fəsadlardan sonra dəvə öz sağıcısına süd vermədiyi və onu öz balasına saxladığı kimi bizə tərəf meyl göstərəcək.»

Sonra isə qeyd olunan ayəni oxudu.

Sual 2: Zühura e᾽tiqad yalnız şiələrə məxsusdur?

Cavab: Bu əqidə təkcə şiələrə və yaxud digər müsəlmanlara aid deyildir. Demək olar ki, bütün dinlərdə, axırəzzamanda zühur edərək dünyaya nicat verəcək bir islahediciyə e᾽tiqad bəslənir.

Qur᾽anda da bir çox ayələrdə (124 ayədən çox–red.), bu mətləbə işarə olunmuşdur. «Ənbiya» surəsinin 105-ci ayəsində oxuyuruq:

«Tövrat kitabından sonra Zəburda yazdıq ki, ləyaqətli bəndələrim yer üzünün hakimi olacaq.»

Bu əqidə hətta Tövratda, İncildə, hindi və zərdüştlük kitablarında, o cümlədən çinlilərin, qədim misirlilərin və qərb əhalisinin arasında da mövcuddur.

Rəvayət olunduğu kimi, həzrət İsanın (ə) tərəfdarlarından bir qrupu o Həzrətin hüzurunda ikən, ondan dünyanın axırının necə olacağı barədə soruşdular. Həzrət İsa (ə) onların cavabında buyurdu:

«Məndən sonra Allah tərəfindən Əhməd (ə) adlı bir peyğəmbər gələcək ki, onun övladlarından biri insanlar üçün Allahın höccəti olacaq. O, yer üzü zülm və sitəmlə dolduqdan sonra qiyam edəcək və dünyanı haqq-ədalətlə bəhrələndirəcək. Mən o həzrətin zühurundan sonra göydən yerə enəcəyəm və mənim zühurum qiyamətin başlanmasının əlaməti olacaq.»

Sual 3: Beş yaşlı uşaq necə imam ola bilər?

Atası imam Həsən Əsgəri (ə) vəfat edən zaman həzrət Məhdinin (ə.c.) beş yaşı var idi. Necə ola bilər ki, beş yaşlı uşaq imam olsun?

Cavab: Bu sualın cavabı izahlı şəkildə az yaşlı imam ünvanında «İmam Cavadın (ə) həyatına baxış» kitabında verilib. Sözün qısası budur ki, sonsuz qüdrət və hikmət sahibi olan Allah, imamət ləyaqətini az yaşlı bir uşağın vücudunda da yerləşdirə bilər.

Bə᾽zən dünyada, adi xalq arasında İbn Sina və Tomas Yonq kimi qeyri-adi fikri istedada malik olan az yaşlı uşaqlar da vardır ki, onların bir aydakı fikri inkişafı, başqalarının on ildəki fikri inkişafına bərabərdir. Buna görə də, bu iş qeyri-mümkün işlərdən sayılmır.

Həzrət Məhdidən (ə.c.) də əvvəl İmam Cavad (ə) və İmam Hadi (ə) də uşaq yaşlarında imamət məqamına yetişmişdilər. Peyğəmbərlər arasında isə, Həzrət İsa (ə) və Yəhya (ə) uşaq yaşlarında peyğəmbərlik məqamını əldə etmişdilər. «Məryəm» surəsinin 12 və 30-cu ayələrində bu mətləbə işarə olunmuşdur.

Sual 4: Həzrət Məhdinin (ə.c.) mübarək adını tələffüz etmək

Bir çox rəvayətlərə görə, Həzrət Məhdinin (ə.c.) mübarək adını İslam Peyğəmbərinin adı olan «Məhəmməd» adı ilə tələffüz etmək qadağan olunmuşdur. Buna görə də, onun adını bu qaydada (M-H-M-D) yazırlar. Onun adını çəkmək haramdırmı? Haramdırsa, səbəbi nədir?

Cavab: Bu məsələ fiqhi bir məsələdir. Alim və fəqihlərin bə᾽ziləri rəvayətlərdə etdikləri axtarışlardan belə nəticəyə gəlirlər ki, imamlar o həzrətin adını çəkməyi yalnız çox sıxıntılı və xətərli dövrdə, onun düşmənlərdən qorunması üçün qadağan etmişlər. Lakin indiki dövrdə buna ehtiyac yoxdur.

Buna əsasən, naiblərindən biri həmin sualı müqəddəs nahiyədən soruşarkən, həzrət Məhdi (ə.c.) tərəfindən belə cavab gəldi:

«Əgər onlara adı söyləsəniz, onu aşkar edər, yerini biləndən sonra (qətlə yetirmək üçün-red.) onun əleyhinə qalxarlar.»

Buna görə də, hətta imam Həsən Əsgəri (ə) özü də, ehtiyatlıq ehtiyac olmadığı zaman həzrətin mübarək adını dilə gətirirdi. O cümlədən, rəvayətlərdə qeyd olunduğu kimi, İmam Həsən Əsgəri (ə) səhabələrindən bə᾽ziləri üçün qurbanlıq bir qoyun göndərərkən buyurardı:

«Bu qoyun, oğlum Məhəmmədin qurbanlığıdır.»

Böyük alimlərdən Şeyx Müfid, Əllamə Hilli, Fazil Miqdad, Seyyid Mürtəza və Mühəqqiq kimi şəxslər öz kitablarında həzrətin (ə.c.) mübarək adının çəkilməsinin haram olmamaması barəsində geniş bəhs etmişlər. Şeyx Hürr Amilinin də, görüşü bununla müvafiqdir. Əllamə İrbili də ehtiyata ehtiyac olmadığı zamanda Həzrət Məhdinin (ə.c.) mübarək adınının tələffüz olunmasına icazə vermişdir.

Sual 5: Bir insan min ildən artıq yaşaya bilərmi?

İnsanın ömrünün son həddi demək olar ki, təqribən yüz iyirmi ildir. Bəs o Həzrət indiyədək, necə sağ qala bilmişdir?

Cavab: Elm və din nəzərindən uzun ömür sürməyin qeyri-mümkün olmaması sabitləşmişdir. Əgər Allah iradə edərsə insan hətta qiyamətəcən sağ qala bilər.

Təbiətşünasların nəzərincə, qocalığın və ölümün əsas səbəbi insanın düçar olduğu cismi xəstəliklərdir. Bə᾽zi təbiətşünaslar belə deyirlər: İnsan üç yüz il yaşamalıdır, lakin onun bədən üzvlərinin zəifləməsi və bunun başqa üzvlərə sirayət etməsi nəticəsində, yetmiş yaxud, səksən il ömür sürür.

Alimlər bitki və həşəratlar üzərində apardıqları təcrübələr nəticəsində, bə᾽zən onların ömrünü yüz illik adi ömür səviyyəsinə çatdırmışlar. Buna görə də, elm baxımından müstəsna insanların uzun ömür sürməsinin inkar edilməsinə bir dəlil yoxdur. Dini baxımdan da, bu məsələnin sübutu çox aydındır. Necə ki, məzhəbi tarixlər və dinlər İlyas (ə), Xızır (ə) və İsa (ə) kimi şəxslərin indiyə qədər yaşamasını, Loğman və Nuh kimi şəxslərin uzun ömür sürdüyünü bizə göstərir. Qur᾽anın aşkar bəyanına uyğun olaraq, elə təkcə həzrət Nuh (ə) 950 il peyğəmbərlik etmişdir. Rəvayətlərə görə Süleyman (ə) 712 il, Loğman (ə) 4 min, yaxud 400 il, Ad (ə) 3500 il, Adəm (ə) 930 il və Nuh (ə) isə 2500 il yaşamışlar.

Sual 6: Uzun müddətli qeybin nə faydası vardır?

Həzrət Məhdinin (ə.c.) yüz illər bizdən gizli yaşamasının və uzun müddət qeybət aləmində ömür sürməsinin nə faydası vardır?

Cavab: Onun qeybdə olmasına səbəbi bizik. Necə deyərlər əllərimiz qısa, xurma isə ağacın başında. Əgər o Həzrət xalqın onun gəlişinə hazır olmadığı bir vaxtda zühur edərsə, başqa imamlar kimi o Həzrət də, imamət məktəbinin ali məqsədlərinə çatmazdan əvvəl dünyadan köçər. Halbuki, Allah-taala özü onun zühurunu istəyir ki, yer üzünü haqq-ədalətlə doldursun və bütün övliyaların, peyğəmbərlərin məqsədlərini həyata keçirsin. Belə bir zühurun dərin və geniş bir hazırlığa ehtiyacı vardır.

Rəvayətlərə görə onun qeybdə olması, günəşin qara buludlar arxasında gizlənməsinə bənzəyir. Buludlar onun önünü kəssə də, o, öz nurunu bütün dünyaya çatdırır və insanlar onun nurundan, istisindən bəhrələnirlər. O Cənabın qeybdə olmasının fəlsəfəsini aşağıdakı üç bənddə xülasə etmək olar:

–Və᾽d edilmiş Məhdiyə (ə.c.) ümid bəsləmək, qəlbə rahatlıq verir və bizə onun intizarı ilə yaşamağı öyrədir. Belə bir ümid təhrikedici ümiddir;

–Həzrətin qeybdə olması və vilayəti-fəqihin onun tərəfindən canişinliyi, şiələrin pillə-pillə irəliləməsinə və onun zühuruna hazırlıq üçün əsas səbəbdir;

–Eyni zamanda, o Həzrət qeybdə olduğu vaxtda fəqihlərin, rəhbərlərin və haqqın yolunu gedənlərin güclü dayağıdır.

Həzrət Məhdinin (ə.c.) qeybdə olmasının səbəblərini araşdırdıqda, insan bu nəticəyə yetişir ki, günəş önündəki qara buludlar kimi maniələr o Həzrəti qeyb pərdəsi arxasında saxlayır. İnsan bu araşdırmada maniələri tanıyır və onların aradan qaldırılması üçün səy göstərir.

Sual 7: Dəccal və Süfyani kimdir?

Həzrət Məhdinin (ə.c.) zühurunun nişanələrindən biri də, Dəccal və Süfyaninin meydana çıxmasıdır. Bu iki nəfər Həzrətin qoşunu tərəfindən qətlə yetiriləcəklər. Onlar kimdir, haradadır və necə öləcəklər?

Cavab: Bə᾽zi rəvayətlərə uyğun olaraq, bir qrup yalançı şəxs, həzrət Məhdinin (ə.c.) qiyamı zamanı onun əleyhinə bayraq qaldıracaq. Dəccal və Süfyani adlı iki nəfər Şam və Fələstin məmləkəti tərəfindən zahir olacaqlar. Bu iki nəfər İmam əleyhinə üsyan edəcək həqiqi tağutdur.

Dəccal öz hiylələri ilə xalqın bir hissəsini ətrafına toplayıb, İslamın əleyhinə qiyam edəcək. Həzrət Əli (ə) bir xütbəsində buyurur:

«Məhdi (ə.c.) öz qoşunu ilə Məkkədən Beytül-müqəddəsə gələcək. Dəccal və onun qoşunları ilə müharibə edəcək və onları məhv edəcək.»

Bə᾽zi rəvayətlərə görə Dəccal yaxalanıb, «Künaseyi-Kufə» məhəlləsində dar ağacından asılacaq. Onun tərəfdarlarının əksəriyyəti, Ərazil, Övbaş, digər soylardan və zinazadələrdir.

İsa peyğəmbər (ə) Həzrət Məhdinin (ə.c.) köməyinə gələcək, Dəccalın qətlində iştirak edəcək və insanları onun fitnəsindən xilas edəcək.

Süfyani özünü müqəddəs cilvədə nümayiş etdirərək, meydana çıxan başqa bir tağutdur. O, Ətəbət ibni Əbu Süfyanın nəslindəndir. Sifətinin rəngi sarıya çalan qırmızı rəngdədir. Süfyaninin cinayətləri daha artıq olacaq.

Məhəmməd peyğəmbər (s.ə.v.s.) buyurmuşdur:

«Süfyani qoşunları ilə Yabis səhrasından (Dəməşq şəhərinin ətrafı) Dəməşq şəhərinə daxil olacaq. İki qoşun təşkil edib, birini şərqə, o birisini isə Mədinə şəhərinə tərəf göndərəcək. Birinci göndərdiyi qoşun Bağdad və Kufə şəhərlərində böyük qətl və cinayətlərə əl atacaq. İkinci qoşun isə, Mədinə şəhərində üç gün-üç gecə qaldıqdan sonra Həzrət Məhdinin (ə.c.) qoşunları ilə döyüşmək üçün Məkkə şəhərinə tərəf hərəkət edəcək. Onlar «Beyda» səhrasına çatdıqda, Cəbrayıl (ə) Allahın əmri ilə yerə elə bir zərbə vuracaq ki, onlarin iki nəfərindən başqa, qalan hamısı yerə batacaq və məhv olacaq.»

Nəhayət, həzrət Məhdi (ə.c.) öz qoşunları ilə Kufədən Süfyaninin özünə mövqe seçdiyi «Beytül-müqəddəs» kənarına tərəf hərəkət edəcək. Müzakirə və danışıqlardan sonra həzrət Məhdi (ə.c.) ilə Süfyaninin qoşunları arasında müharibə baş verəcək. İmam Məhdinin (ə.c.) qoşunları qələbə çaldıqdan sonra yer üzü Süfyaninin və onun tərəfdarlarının natəmiz vücudunun şərindən təmizlənəcək.

Bə᾽zi rəvayətlərə görə, Süfyani imam Məhdinin (ə.c.) əli ilə yaxalanacaq, Həzrətin fərmanı ilə boynu vurulacaq və Beytül-müqəddəsə daxil olan məkanda bir daş üzərində tikə-tikə ediləcək.