KİTABXANA-Esrin imamı ile elaqedar 15 suala cavab-2

Əvvələ

Dünya maddi imkanlar cəhətdən İslam düşmənlərinin əlindədir. Onların böyük iqtisadi qüdrətlərinin müqabilində necə böyük İslam hökuməti qurmaq olar?

Cavab: Həqiqət budur ki, dünyanın qüdrətli dövlətlərinin inkişaf amilləri müsəlmanların da ixtiyarında vardır. Əgər müsəlmanlar vəhdəti yaşatsalar hər şeyə nail olarlar.

Bəhsin geniş izahı: Böyük qüdrətlər arasında baş verən cinayətlər onları daxildən sarsıdacaqdır.

Bundan əlavə müsəlmanların imkanları müxtəlif cəhətdən yadların imkanlarından daha üstündür:

a) Həmkarlıq cəhətdən

Hal-hazırda bir milyarddan çox, yə᾽ni yer kürəsinin dörddə bir hissəsində müsəlmanlar yaşayır və əllidən artıq müstəqil dövlətlərə malikdirlər. Qeyri-islam dövlətlərin əksəriyyətində də, böyük qüvvə və cəmiyyətə malik olan müsəlmanlar yaşayır. Əgər bunlar həmkar olub, Qur᾽anın bayrağı altında bir yerə toplaşsalar, dünyada heç bir qüvvənin onların qarşısında dayanmağa cür᾽əti olmaz.

Beynəlxalq aləmdə müsəlmanların əllidən çox rə᾽yləri vardır. Əgər bunlardan hər biri başqa dövlətlərdən bir rə᾽y əldə etsələr, yüz rə᾽yə malik olarlar. Dünyada heç bir birləşmə bu qədər rə᾽yə malik deyil.

b) İslam aləminin iqtisadi imkanları.

Müsəlmanların iqtisadi vəziyyəti bir həddədir ki, təkcə dünya yanacağının ən azı 40%-i müsəlmanlar tərəfindən tə᾽min olunur.

Afrika qitəsinin yetmiş faizi müsəlmandır. Ora Avropanın barıt anbarı sayılır. Əgər bu anbar bağlanarsa, Avropa süqut edər. Məsələn, Yaponiyanın bir hissəsi İslam dünyasına bağlıdır; iki ay müddətində İslam dünyası ilə əlaqəsini kəsərsə, soyuq və qaranlıq bir adaya çevrilər. (Bir də ki, əziz oxucu yaxşı bilir, Allah qüdrəti qarşısında heç bir qüvvə tab gətirə bilməz-red.)

Sual 9: Rəc᾽ət

Həzrət Məhdinin (ə.c.) zühurundan sonra imamların, yaxşı və pis insanların bir qrupunun həyata dönərək əməllərinin mükafatını almaları fikiri nə dərəcədə düzgündür?

Cavab: Ölülərin dirilmə imkanı, İslam baxımdan qəti bir işdir. Necə ki, «Bəqərə» surəsinin 260-cı ayəsində həzrət İsanın (ə) Allahın izni ilə ölüləri diriltməsinə işarə edilmişdir.

Həzrət Məhdinin (ə.c.) zühuru zamanı imamlar bir-birindən sonra ardıcıl surətdə həyata qayıdacaq. Həyata ilk dönən imam İmam Hüseyn (ə) olacaq.

Əshabi-Kəhf, Malik Əştər və Miqdad kimi iyirmi yeddi nəfər ləyqətli insanlar diriləcək və Nəcəf şəhərində Həzrət Məhdinin (ə.c.) qoşunlarına qoşulacaq.

İmam Hüseyn (ə) şəhid olan zaman, yer-göy özünəxas halları ilə nalə çəkib dedilər: «Ey ulu Allah! Bizə izn ver, bütün məxluqatı həlak edək. Çünki bunlar sənin şərəfli bəndəni həlak etdilər. Allah taala onlara vəhy etdi: «Ey mələklər, yerlər və göylər! Aram olun.» Sonra isə qeyb pərdələrindən bir pərdəni arxaya çəkib, Həzrət Məhəmmədi (s) və on iki imamı onlara göstərdi. Bu vaxt onların içərisində həzrət Məhdini (ə.c.) göstərib, üç dəfə buyurdu: «İmam Hüseynin (ə) intiqamını bu şəxsin vasitəsilə alacağam.»

İmam Sadiq (ə) buyurmuşdur:

«Həqiqətən imam Hüseyn (ə) həzrət Məhdinin (ə.c.) ömrünün son anlarında rəc᾽ət edəcək və Məhdi (ə.c.) vəfat etdikdən sonra onun bədəninə qüsl verəcək.»

Sual 10: Həzrət Məhdinin (ə.c.) iqamətgahı və məskunlaşma mərkəzi.

Həzrət Məhdinin (ə.c.) məkanı haradadır? Həyat yoldaşı və övladları varmı? Zühur edən zaman haradan, nə vaxt və hansı gün zühur edəcək? Hökumətinin mərkəzi hara olacaq?

Cavab: Bu suallara cavabını hədislərə müraciət etməklə verə bilərik. Bə᾽zi rəvayətlərə görə, o Həzrət hər il Həcc mövsümündə iştirak edir. Habelə, müxtəlif məkanlara xüsusilə də, imamların qəbri kənarına və digər müqəddəs yerlərə baş çəkir.

İslamın evlənməyə olan diqqətini nəzərə alsaq deyə bilərik ki, ailə qurmuşdur. Əhli-beytdən bizə yetişən dualarının bə᾽zisində bu məsələyə toxunulmuşdur.

Rəvayətlərdə onun iqamətgahı barəsində bir neçə məkan qeyd olunmuşdur. Məsələn, Mədinə şəhəri, Hicaz səhrası, Rəzva dağı, Kər᾽ə (Yəmən şəhərinin bir kəndi) və əlçatmaz diyarlar. O cümlədən, rəvayət olunmuşdur ki, həzrət Məhdi (ə.c.) övladları ilə birlikdə dənizin çox böyük və geniş adalarının birində yaşayacaq.

Nəcəf əhli olan Əli ibni Mazandaraninin rəvayətinə görə, Həzrət Məhdi (ə.c.) öz dostları və övladları ilə birlikdə «Xəzra» adlı bir adada yaşayır.

Xəzra adası haqqında çoxlu bəhslər edilmişdir. Alimlərin bə᾽zisi bir sıra dəlillərə əsaslanaraq belə güman edirlər ki, Xəzra adası yer üzünün ən qəribə və sirli məkanı, Atlantik okeanın qərb hissəsində yerləşən «Bermud üçbucağı»dır.

Bermud üçbucağının sirli əlamətlərindən biri budur ki, onun yaxınlığından keçən hər hansı bir gəmi və yaxud təyyarə yox olur.

Həzrət Məhdi (ə.c.) Məkkə şəhərində zühur edəcək, Kə`bə evinə söykənib xütbə oxuyacaq və üç yüz on üç nəfər orada o Həzrətə qoşulacaq.

İmam Sadiq (ə) buyurmuşdur:

«Həzrət Məhdi (ə.c.) ilə bey᾽ət edən ilk şəxs Cəbrayıl (ə) olacaq.»

Redaktordan:

a) Alimlərin araşdırmalarına əsasən imamın ailə sahibi olması zəif ehtimaldan başqa bir şey deyildir. Bə`zi dualarda İmamın övlad sahibi olmasına işarə edilsə də onun zühurdan əvvəlki dövrə, yoxsa zühurdan sonrayamı aid olduğu aydın deyildir.

Bə`zi alimlərin nəzərincə bu məsələni bilməyin insanlara bir faydası olsaydı imamlar (ə) bu barədə sükut etməzdilər.

b) İmamın daimi məskunlaşdığı bir məkan yoxdur. O Həzrət işləri ilə əlaqədar olaraq müxtəlif məkanlarda müşahidə edilmişdir. Xəzra adası barədə nəql edilmiş hədisin həm sənəd silsiləsində, həm də məzmununda naqislik vardır (Bu barədə Ayətullah Əmininin «Ədalət Günəşi» kitabına müraciət edə bilərsiniz).

Sual 11: Həzrət Məhdinin (ə.c.) zühur əlamətləri nədir?

Cavab: O həzrətin zühur vaxtı mə᾽lum deyil. Bə᾽zi rəvayətlərə görə, zühur əlamətləri müxtəlifdir.

Bu əlamətləri üç qismə bölmək olar:

–Ümumi əlamətlər, günahların çoxalması və dünyanın zülmlə dolması kimi. Bu əlamətlər həzrət Məhdinin (ə.c.) zühuruna yaxın deyil, zühurdan on il qabaq baş verən hadisələrdir.

–Həzrətin zühuruna yaxın olan əlamətlər. Məsələn, zühurdan iki, üç və ya dörd il qabaq baş verən hadisələr.

–Həzrət Məhdinin (ə.c.) zühuru zamanı baş verəcək hadisələr.

Bundan əlavə, bu əlamətlərin bə᾽zisi aşkar, bə᾽zisi isə gizlidir.

Həmçinin, gərək diqqət edək ki, həzrət Məhdinin (ə.c.) zühuru ilə qiyamının arasında fasilə vardır. Əvvəl zühur edəcək, sonra qiyam. Rəvayətdə deyilmişdir:

«Ramazan ayının iyirmi üçüncü gecəsində imam Məhdinin (ə.c.) adı ilə bir səs ucalacaq və aşura günündə qiyam edəcək.»

Ola bilsin ki, Ramazan ayının iyirmi üçüncü gecəsindəki nidadan məqsəd, Həzrətin zühurunun e᾽lan olunmasıdır.

Dəccal, Süfyani, Həsəni və Yəmaninin meydana çıxması Həzrət Məhdinin (ə.c.) zühurunun qəti əlamətlərindəndir.

Nəfsi Zəkiyyənin şəhadəti: Nəfsi Zəkiyyə Ali Məhəmmədin pak bir cavanıdır. Həzrət Məhdi (ə.c.) camaatdan kömək istəmək üçün onu Məkkə şəhərinə göndərəcək. O, Məkkədə İmamın xəbərini xalqa çatdırdıqdan sonra düşmənlər həmlə edib, onu günahsızcasına Həcərül-əsvədlə Məqami-İbrahimin arasında qətlə yetirəcək və başını bədənindən ayıracaqlar. Bu faciədən on beş gün sonra həzrət Məhdi (ə.c.) qiyam edəcək.

Sual 12: Həzrət Məhdinin (ə.c.) hakimiyyət illəri nə qədərdir?

Cavab: Həzrət Məhdinin (ə.c.) hökuməti barədə olan rəvayətlər müxtəlifdür. Nəql olunmuşdur ki, Həzrət, beş, yeddi, iyirmi, yetmiş və yaxud doxsan il hökumət edəcək.

Həmçinin rəvayətlərdə, həzrətin (ə.c.) üç yüz doqquz il hakimiyyətdə olması da bildirilmişdir.

İmam Baqir (ə) buyurmuşdur:

«Həzrət Məhdi (ə.c.) üç yüz doqquz il, Əshabi-Kəhfin öz mağaralarında yatdıqları qədər hökumət edəcək. Zülmlə dolmuş yer üzünü haqq-ədalətlə dolduracaq. Allah-taala yer üzünü şərqdən-qərbə onun tabeliyinə gətirəcək. O, düşmənləri məhv edəcək və yer üzündə yalnız İslam dini hakim olacaq.»

Sual 13: Həzrət Məhdinin (ə.c.) vəfatı necə olacaq?

Cavab: Həzrət Məhdinin (ə.c.) ömrünün sona çatması haqqında rəvayətlərdən nəticə əldə edərək belə cavab verə bilərik ki, imamların hamısı şəhid olaraq dünyadan getdiyi kimi o Həzrət də şəhid olaraq dünyadan gedəcəkdir. O cümlədən, İmam Hüseyn (ə) buyurmuşdur:

«And olsun Allaha, onun Rəsulu bizimlə belə əhd bağlamışdır ki, Həzrət Əli və Fatimə (ə) övladlarından on bir nəfəri imamət məqamına yetişəcək.»

Tarixə nəzər salsaq görərik ki, İmam Məhdiyə (ə.c.) qədər olan bütün imamlar qılınc, yaxud zəhərlə şəhadətə yetişmişlər. Həzrət Məhdi (ə.c.) də şəhid olaraq dünyadan gedəcəkdir.

Həzrət Məhdinin (ə.c.) şəhadəti haqqında əlimizdə, Əllamə Yəzdinin «İlzamünnasib» kitabında yazdığı rəvayətdən savayı özgə bir rəvayət yoxdur.

O, yazır: «Həzrət Məhdinin (ə.c.) hökumətindən yetmiş il keçdikdən sonra Bəni-Təmim qəbiləsindən Səidə adlı üzü tüklü bir qadın Həzrət yoldan keçərkən, evin üstündən İmamın başına ağır bir daş atacaq və bu Həzrətin şəhid olmasına bais olacaq. İmam Hüseyn (ə) o Həzrətin qüsl, kəfən və namazını öz öhdəsinə alacaq.»

Bu mətləb imamların rəvayətlərindən götürülmüşdür. Sonra isə İmam Hüseyn (ə) hökuməti əlinə alacaq. Beləliklə, ondan sonra imamlar ardıcıl şəkildə, rəc᾽ət edərək hakimiyyətə gələcəklər.

Bə᾽zi rəvayətlərə görə, Həzrət Məhdinin (ə.c.) vəfatından sonra təkcə İmam Hüseyn (ə) qırx il hökumət edəcək.

Sual 14: Həzrət Məhdinin (ə.c.) qiyamı silahlı mübarizədir?

Cavab: İmam Məhdi (ə.c.) zühur etdikdən sonra onun apardığı mübarizələri bəyan edən bir çox rəvayətlərdən bəlli olur ki, o Həzrət zühur etdikdən sonra ilk mərhələdə İslam Peyğəmbəri (s) kimi, xalqı İslama və özünə bey᾽ətə də᾽vət edəcək. Bu də᾽vətin müqabilində bir qrup onun əleyhinə qalxan zaman, Həzrət onlarla mübarizə aparacaq və yer üzünü onların xəbis vücudundan təmizləyəcək.

Sual 15: Həzrət Məhdi (ə.c.) ilə görüşənlər.

Qeybəti-süğra dövründə həzrət Məhdi (ə.c.) ilə görüş səadətinə nail olanlar varmı?

Cavab: Qədim alimlərin yazdığına əsasən, bir çox saleh və ləyaqətli insanlar, qeybəti-süğra dövründə müxtəlif hallarda Həzrətin hüzuruna şərəfyab olmuşlar. Bu görüş əhvalatları o qədər çox nəql edilmişdir ki, imam Məhdi (ə.c.) ilə görüşməyin mümkünlüyü haqqında yarana bilən hər hansı bir şək-şübhəyə son qoyur.

Şeyx Müfid kimi böyük alim «İrşad», şeyx Küleyni «Üsuli-Kafi» və Şeyx Hürr Amili «İsbatül-hüdat» kitabında yüzlərlə bu cür əhvalat nəql etmişlər ki, bunların hamısı həzrət Məhdi (ə.c.) ilə görüşməyin mümkün olduğunu bəyan edir. İndi isə, diqqətinizi Həzrətlə görüşən şəxslərin birinə cəlb edirik.

İmam Zamanın (ə.c.) göstərişi ilə xaricdən gələn qadının xilas olması:

Amerikada bir müsəlman tələbə universitetdə təhsil alırdı. Onun xoş əxlaqına aşiq olan bir amerikalı xristian bir qız onunla evlənmək təklifini irəli sürdü. Tələbə ona cavabında dedi:

–Müqəddəs İslam şəriətində müsəlmanın xristianla evlənməsinə icazə verilmir. İslam dinini qəbul etsən, səninlə evlənməyə razı olaram.

Tələbə İslam kitablarından bir neçəsini o qıza verdi. O, bu kitabları oxumaqla, İslam dinini qəbul edib, tələbə ilə evləndi. Tələbə öz həyat yoldaşı ilə vətənə qayıtdıqda, orada Həcc ziyarətinə ad yazıldığını eşidir. O, həyat yoldaşına Həcc ziyarətinə getmək təklifini edir. Onlar Məkkəyə yolla düşürlər.

Qurban bayramı günü cəmiyyətin izdihamında qadın Minada itdi. Hər nə qədər ərini axtardısa, tapa bilmədi. yorğun və pərişan halda Məkkəyə qayıdıb, sınıq qəlblə Kə`bə evinin kənarında öz-özünə dedi:

«Həyat yoldaşım deyirdi ki, bizim İmam Zamanımız (ə.c.) var. Ey İmam Zaman! Ey pənahsızların pənahı! Əlim ətəyində, məni öz həyat yoldaşıma çatdır.»

Sözü hələ bitməmişdi ki, ərəb qiyafəli bir şəxs ona yaxınlaşıb, soruşdu:

«Nə üçün qəmlisən?.»

Qadın başına gələni ona söylədikdə, o, dedi:

«Heç narahat olma, ərini tapmaq istəyirsənsə, mənimlə gəl.»

Qadın bir qədər getdikdən sonra ərini görərək, sevincindən göz yaşı tökdü, ancaq nə qədər göz gəzdirdisə, həmin ərəbi görə bilmədi. Hadisəni öz yoldaşına danışdı.