Zimbabve Mərkəzi Bankı dövriyyəyə 100 milyard dollarlıq əsginas daxil edir. Əsginas bu gündən etibarən dövriyyədə olacaq. Amma bu əsginaslar ABŞ dolları deyil, yerli dollardır.
Maraqlıdır ki, 100 milyard Zimbabve dolları hətta bir çörək almağa belə kifayət etmir. Zimbabvenin 100 milyard dolları təxminən 1 ABŞ dollarına bərabərdir və həmin pula ancaq dörd portağal almaq mümkündür. Qeyd edək ki, Zimbabvedə son aylar dəhşətli infilyasiya hökm sürür. Hələ may ayında dövriyyəyə yeni banknotlar daxil edilən zaman 50 milyon Zimbabve dolları 1 ABŞ dollarına bərabər olub. Həmin pula üç çörək almaq mümkün olurmuş. İyulun 16-na olan məlumata görə isə ölkədə illik infilyasiya sürəti 2,2 milyon faizə çatıb. Daha bir maraqlı məqam ondan ibarətdir ki, Zimbabve Mərkəzi Bankının dövriyyəyə daxil etdiyi əsginaslar pul deyil, təqdim edilən çekdir. Belə banknotların vaxtı sərt şəkildə məhdudlaşdırılıb. Məsələn, 100 milyard dollarlıq əsginaslar 2008-ci il dekabrın 31-nə kimi qüvvədə olacaq./Lent.az/
