«Biz ölkədə vəhabiliyi qadağan etməyə hazırlaşmırıq. Lakin əgər bu və ya digər məzhəbin, o cümlədən vəhabilik cərəyanının nümayəndələri radikal hərəkətə yol verərlərsə, qanun çərçivəsində onların fəaliyyətinin qarşısı alınacaq», - Azərbaycan Prezidentinin İcra Aparatı rəhbəri Ramiz Mehdiyev çərşənbə axşamı jurnalistlərə bildirib.

Dini sahədə qadağalar mənfi proseslərə gətirə bilər. «Əgər islam dininə etiqad edən insalardan biri dövlətə qarşı fəaliyyət göstərərsə və cinayət törədərsə, o, qanun tərəfindən dini cərəyanın nümayəndəsi kimi deyil, adi vətəndaş kimi mühakimə edilə bilər», - bir müddət əvvəl Azərbaycan Parlamentinin İnsan hüquqları üzrə daimi komissiyasının sədri Rəbiyət Aslanova Trend News-a bildirib.

Azərbaycanda dövlət üçün təhlükəli olan dini qruplar yoxdur və yaxın gələcəkdə də olmayacaq. «Dini Qurumlarla İş üzrə Dövlət Komitəsi dini icmaların qeydiyyatını aparır və dini qrupların fəaliyyəti haqqında xəbərdar edilib», - Azərbaycanın Dini Qurumlarla İş üzrə Dövlət Komitəsində hesab edirlər.

TREND