Havaların kəskin şəkildə istiləşməsi şəraitində Bakı Metropolitenində də sərnişinlər üçün ciddi problemlər yaşanmaqdadır. Xüsusilə də dünən metro nəqliyyatından istifadə edən paytaxt sakinləri ciddi problemlərlə üzləşiblər. Belə ki, vaqonlarda nəfəskəsən isti müşahidə olunub. Sərnişinlərin sözlərinə görə, əvvəlki vaxtlarda sərin yer axtaran insanlar nəqliyyatın bu növündən istifadə edirdisə, indi artıq yerin altında, metroda da kəskin isti müşahidə olunur. Bunun səbəbini araşdıran müxbirimizə metropolitenin adının çəkilməsini istəməyən əməkdaşı maraqlı bir açıqlama verib. Onun sözlərinə görə, Bakı Metropoliteninin elektrik enerjisi borcuna görə havatəmizləyici sistemin işində böyük fasilələr yaranır və bu da havanın ağırlaşmasına gətirib çıxarır. Məlumatlı mənbə vintilyasiya sisteminin köhnə olduğunu və maddi problemlər səbəbindən onların müasirləşdirilməsinin hələlik mümkün olmadığını da bildirdi. Ancaq istisna olunmur ki, metropoliten rəisi bütün bu problemlərin mövcudluğu səbəbindən yaxın aylarda metroda gediş haqqının qaldırılması barədə növbəti dəfə Tarif Şurasına müraciət ünvanlasın. Metropoliten əməkdaşı qəzetimiz vasitəsilə ürək-damar xəstəliyindən əziyyət çəkənlərin bugünlərdə metrodan istifadə etməyi məsləhət görmədiyini də bildirdi. Məsələ ilə bağlı Metropoliten rəhbərliyinin mövqeyini öyrənmək istəsək də, iş gününün sonu olduğundan bu, mümkün omadı.
