Bu gün prezident İlham Əliyev respublikada əhalinin ərzaq məhsulları ilə etibarlı təminatına dair dövlət proqramının hazırlanması haqqında sərəncam imzalayıb. Məlumatı "Azərtac" dövlət agentliyi yayıb.

Sərəncamda bildirilir ki, Azərbaycan Respublikasında əhalinin zəruri ərzaq məhsulları ilə təmin edilməsi dövlətin iqtisadi siyasətində mərkəzi yer tutur. Lakin dövlət başçısı hesab edir ki, ölkədə əsas ərzaq məhsullarına tələbatın yerli istehsal hesabına tam təminatı hələ ki, mümkün olmayıb: «Dünya ərzaq bazarlarında isə tələbin böyük fərqlə təklifi üstələməsi səbəbindən son vaxtlar ərzaq mallarının qiymətlərində yüksək artım müşahidə olunur. Qeyd olunan qiymət artımı Azərbaycanda da ərzaq məhsullarının bahalaşmasında özünü büruzə verir. Bu isə əhalinin, xüsusilə onun aztəminatlı hissəsinin ərzaqla təminatına və həyat səviyyəsinə mənfi təsir göstərir. Mövcud şərait daxili ərzaq bazarının idxaldan asılılığının maksimum azaldılması və ərzaq ehtiyatlarının yaradılması məsələlərinə kompleks yanaşma tələb edir».

Sərəncamda Nazirlər Kabinetinə tapşırılır ki, əhalinin ərzaq məhsulları ilə etibarlı təminatına dair Dövlət Proqramının layihəsini üç ay müddətində hazırlanıb prezidentə təqdim edilsin. Həmçinin, dövlət proqramının layihəsinin hazırlanmasına müvafiq icra hakimiyyəti və digər dövlət orqanlarının, elmi təşkilatların, qeyri-hökumət və ictimai təşkilatların nümayəndələrini və müstəqil ekspertləri cəlb etnək tövsiyyə edilir./ANSPRESS/