PEYĞƏMBƏRİMİZİ TƏHQİR EDƏN YAZI NƏŞR EDİLƏN "SƏNƏT" QƏZETİ FƏALİYYƏTƏ BAŞLAYIR

   İslam Peyğəmbərini təhqir edən yazı dərc edilmiş "Sənət" qəzeti öz fəlaiyyətini bərpa edib.
   
    İslam-Azeri-nin Media Forum saytına istinadlı xəbərinə görə İlham Əliyevin 2007-ci ilin sonunda imzaladığı əfv fərmanı ilə azadlığa çıxan Samir Sədaqətoğlu təsisçisi və baş redaktoru olduğu «Sənət qəzeti»nin bərpası istiqamətində fəaliyyətə başlayıb.
   
    Onun sözlərinə görə onlara "ianə" kimi maliyyə yardımı edənlərdən bəziləri indi nədənsə ianə şəklində belə yardım göstərməkdən imtina edirlər.
   
    «Qəzet yenidən Rafiq Tağı ilə əməkdaşlıq edəcəkmi» sualına cavabında baş redaktor bildirib ki, R.Tağının yazılarını çap etməyə həmişə hazırdırlar: «Əlbəttə, bunu özü istəsə və yeni yazılar yazsa. Onunla bağlı heç bir problem ola bilməz. Yenə də əvvəlki kimi Rafiq müəllimlə əməkdaşlıq edəcəyik».
   
    S.Sədaqətoğlu 2007-ci il dekabrın 28-də prezidentin əfv fərmanı ilə azadlığa buraxılıb. Onun həbsinə R.Tağının 2006-cı ilin noyabrında «Sənət qəzeti»ndə çıxmış «Avropa və biz» məqaləsi səbəb olmuşdu. Məqaləyə görə R.Tağı da tutulmuşdu. Onlar Cinayət Məcəlləsinin 283-cü maddəsi (milli, irqi və dini ədavətin qızışdırılması) ilə təqsirli bilinmiş, baş redaktor 4, yazı müəllifi 3 il müddətinə azadlıqdan məhrum edilmişdi.
   
    R.Tağı da dövlət başçısının sonuncu əfv fərmanı ilə azadlığa buraxılıb.
   
    Ancaq biz bu qəzetin yenidən hansı yöndə yazılar yazacağını bilmirik. Yaxşı olardı ki, ləkəyə bulaşmış bu qəzet yenidən nəşr edilməyəydi. Baş redaktor isə daha yaxşı olardı ki, yeni ad ilə məsələn "Tövbəliyəm" adlı qəzet adı alıb öz işinə başlayardı.